Enti bonus ke diberi ngagai pengereja pengawa perintah diseliahka ari chukai, pekereja kompeni peribit mega patut sama
"Nya siti diskriminasi, kelalu balat diskriminasi, semadi mih bonus ke diberi ngagai pekereja dalam sektor kompeni peribit sama bela diseliahka ari dichukai"
Andrew Lo
CEO SBEU
KUCHING: Atur nyeliahka chukai ba bonus ti diberi ngagai pengereja pengawa perintah patut dikena ba pekereja kompeni peribit, pia ku Ketuai Pemesai Eksekutif (CEO) Gerempung Pekereja Bank Sarawak (SBEU), Andrew Lo.
Ku iya, enti pengereja pengawa perintah diseliahka ari chukai nya, nya siti diskriminasi sereta enda adil ngagai pekereja kompeni peribit di menua tu.
"Nya siti diskriminasi, kelalu balat diskriminasi, semadi mih bonus ke diberi ngagai pekereja dalam sektor kompeni peribit sama bela diseliahka ari dichukai," ku iya lebuh dirandau kemari.
Lo ke mega ex-Sekretari Besai Kongres Serakup Sekereja Malaysia (MTUC) Sarawak madah, nengah chara nyeliahka chukai ba bonus ke diberi ngagai pengereja pengawa perintah, raban nya dipinta lebih produktif sereta efisyen ngereja pengawa ke diberi ngagai sida.
"Lalu pengereja pengawa perintah kanan dalam raban profesional enggau administrasyen bulih penguntung tu," ku iya.
Lo bejaku munyi lebuh dipinta ngenang penerang ari Menteri Besai Datuk Seri Anwar Ibrahim ti madahka bonus diberi ngagai pengereja pengawa perintah di semua negeri deka diseliahka ari chukai kena 20 Januari 2023.
Ku Anwar,pemutus nya diambi pengudah berundingka bonus pengereja pengawa perintah nya enda besai sereta enda patut dichukai.
"Ba runding aku endang patut laban bonus nya enda besai.
"Nya alai, bonus nya deka diseliahka ari chukai lalu tu dikena ba semua pengereja pengawa perintah di serata negeri," ku Anwar maya aum media pengudah Aum Kaunsil Kereja Mutarka Sempekat Malaysia 1963 (MA63) ba Kunsil Negeri (DUN) Sarawak.
Ke rikod, langgur penemu nyeliahka chukai nya datai ari Premier Sarawak Datuk Patinggi Tan Sri Abang Johari Tun Openg lebuh iya betemu enggau Menteri Besai sehari sebedau (19 Januari 2023) Aum Kaunsil Kereja Mutarka Sempekat Malaysia 1963 (MA63) diatur .