Anda di sini

Terminal lori keterubah di Sarawak deka digaga di Miri

Advertisement
Bala kaban Serakup Pengarang Berita Utara Sarawak (NSJA) ngena awak pengerami nyambut pengabang ke diatur Lee enggau bini iya, Datin Sri  Christina Kong (berdiri tengah) ba  Dewan Dato Permaisuri, Bandar Baru Permyjaya ditu kemari.
Bala kaban Serakup Pengarang Berita Utara Sarawak (NSJA) ngena awak pengerami nyambut pengabang ke diatur Lee enggau bini iya, Datin Sri  Christina Kong (berdiri tengah) ba  Dewan Dato Permaisuri, Bandar Baru Permyjaya ditu kemari.

MIRI: Opis Menteri Perengka Pengangkut deka ngemansangka projek ngaga terminal lori keterubah Sarawak di bagi menua tu.

Nitihku menteri opis nya, Dato Sri Lee Kim Shin, opis menteri udah meri penemu siti taba ungkup projek nya ba kandang endur semak enggau Eastwood Valley Golf and Country Club (EVGCC) ba Jalai Miri-Bypass ditu.

"Enti udah tembu ila terminal tu deka nyadi palan pengetu sida deriba lori ke bejalai jauh baka ari Kuching ke Miri sebedau sida neruska pengawa nganjung barang ngagai endur ke udah nya nyengkaum ke Limbang, Lawas enggau Sabah sereta ngagai endur bukai.

"Projek tu dilanggur dikemansang ba sebuah taba ti semak enggau EVGCC deka nyadi terminal lori ti keterubah di negeri tu," ku iya.

Lee madahka pekara nya lebuh dirandau maya pengerami nyambut pengabang pengerami Taun Baru China ke diatur iya ba Dewan Dato Permaisuri, Bandar Baru Permyjaya ditu.

Nerang silik pasal projek nya, iya madahka terminal nya ila deka disikap ngena mayuh bengkah perengkaguna baka gudang, woksyop mit alai pengawa ngemanah, alai bemalam enggau kedai makai.

Berebak enggau tu ku Lee, projek terminal lori nya mega iya nya pengawa dipajalaika opis menteri iya kena ngemanahka agi sistem perengka pengangkut enggau logistik di negeri tu.

Nya alai  iya arap bendar projek nya ila deka mai pekara manah baru ngagai gerempung enggau pengemeran lori seraya mantu nyungkak pemansang industri perengka pengangkut lori di Sarawak.

"Laban projek tu ari baruh opis menteri aku, kitai deka bebendar minta ungkup belanja, lalu sida Majlis Bandaraya Mirir (MCC) deka diberi tanggungpengawa nyadi ejensi ti bejalaika perojek nya ila.

"Kami mega merambu deka numbuhka terminal ti sebaka ba beberapa bagi menua besai di Sarawak baka di Kuching, Sibu enggau Bintulu," ku iya.

Ngenang pasal pengerami nyambut pengabang nya, Lee madahka nya siti pengawa asal ti manah sereta patut dipajakka kena ngerapitka ari semengat penyerakup enggau pemaik sereta pengelantang ke udah lama dikemeran sereta dikemeratka rayat ti mayuh pupu bansa di negeri tu.

"Taja udah dua taun kitai enda ngintu pengerami Taun Baru China enggau nyambut  pengabang, tang penyerakup ba rayat agi tegap lalu nya ulih dipeda ari penyampau ke datai sehari tu (kemari)," ku iya.

Advertisement