Makmal nya deka digaga ba tanah sepemesai 30 ekar lalu pansik nya deka dipejalaika Universiti Pertanian Malaysia
KUCHING: Perintah Sarawak udah ngelala tanah ke sepemesai 30 ekar di Lubok Punggor, Gedong alai ngaga makmal endur bejalaika pengawa mansik bekaul engagu berau Biris.
Premier Sarawak Datuk Patinggi Tan Sri Abang Johari Tun Openg madah, pansik nya deka dipejalaika Universiti Pertanian Malaysia lalu naka ke diatu universiti nya nerima kerejasama ari orang bumai di menua nya.
“Aku udah minta raban universiti nambahka pemansut padi ngagai tiga kali ngetau dalam timpuh 18 bulan lalu kitai mega tau nyungkak pemanah nengah chara ngasilka tepung Biris ti tau dikena ngaga biskut ti nyamai sereta bau wangi.
“Laban teknologi baru deka dikena, nya alai kami udah ngelala makmal lenggau tanah pemesai urung 30 ekar di Lubok Punggor ke tuju nya,” ku iya.
Iya bejaku munyi nya maya aum media beserimbai enggau Progra, Penemuai Kereja Premier Sarawak Ke Pelilih Menua Gedong ba Taba Projek di Jalai Lubok Teranggas ke Kampung Gedong enggau Taba Projek Mini Isthmus Gedong Hari Enam nyin tadi.
Ku Abang JohariPerintah Sarawak mega udah nempa kerejasama enggau pengempu tanah ba endur nya.
“Nyema pengawa tu mujur, kami deka ngerembaika ngena betanam betupi pintar nengah pansik nya ke pelilih menua bukai nyengkaum Sri Aman,” ku iya.
Ku iya, industri padi patut ngena memanah betanam betupi pintar enggau teknologi ambika negeri ulih nambahka pemansut padi ti nyadi utai tanam ti meri jamin ngagai stuk pemakai.
“Di Malaysia, kelimpah ari Kedah, Sarawak mega tau nyadi pengeluar berau ti pemadu besai, tang enti deka ngereja nya, kita mesti ngena teknologi baru lalu ukai bepanggai ba chara lama.
“Chara lama bepanggai ba pengarap, tang ngena ulih nambahka asil padi lalu nambahka agi penatai pemisi orang bumai.
“Diatu pukul rata penatai pemisi sida entara RM1,500 nyentuk RM2,000 bepelasarka gaya ke diatu.
"Enti didarab enggau tiga kali ngetau), penatai pemisi RM2,000 mereka didarab tiga nyadi RM6,000, sechara teori," ku Abang Johari ke mega Kaban Kunsil Negeri Gedong.