KUCHING: Perintah Sarawak enggau perintah besai dalam ‘perau’ ti sama ti deka terus ngetan enggau ngenegapka ekonomi sereta nyungkakka penatai pemisi rayat nyengkaum di menua pesisir.
Premier Sarawak, Datuk Patinggi Tan Sri Abang Johari arap bendar perintah Sarawak enggau perintah besai ke dipegai Menteri Besai Datuk Seri Anwar ulih terus nempa kerejasama kena nyapai juluk nya.
“Aku ngarapka perintah besai, kitai ulih bekerejasama kena ngatur pemansang ekonomi ti tan enggau meruan, sereta deka nyungkakka penatai pemisi rayat di menua pesisir enggau mega dalam mengeri.
“Aku ngasaika YAB (Anwar) udah mekuh ngagai pekara tu.
“Aku ngasika kitai dalam ‘perau’ ti sama, aku pechaya enti kitai sama bekayuh, kitai deka nyadi lebih laju enggau sama begulai datai ba palan ke dituju,” ku iya.
Abang Johari ngenang pekara nya dalam jaku pengelalu Majlis Jamuan Negeri nyerumba nyambut penatai Menteri Besai Datuk Seri Anwar Ibrahim datai ke Sarawak, ti diatur ba BCCK ditu, malam ensanus.
Bejaku baru Abang Johari ngenang penegap runding Gabung Parti Sarawak (GPS) ti nadai beginsit bekaul enggau pengawa nyerakupka semua raban bansa.
Iya mega madahka Sarawak deka negika pengeransing menua enggau pengering tauka penegap penyerakup ke bisi ba Sarawak.
“Tok Nan (Pehin Sri Tan Sri Datuk Patinggi Adenan Satem) kala nyebut orang aja nemu bakani chara ngatur Sarawak. Enti pekara tu nyadi, kitai deka nyukung bakih kitai ba endur bukai, kitai nadai penanggul.
“Nya kebuah aku nyambut manah pekara ti dibantaika Yang Amat Berhormat (Anwar) abis nadai diatu kitai ulih ngaga tauka bejalaika projek RM50 juta ke baruh. Engka penyampau nya ulih ditambahka. Terima kasih ke pekara tu.
“Aku chukup pechaya nuan Yang Amat Berhormat baka ke dipadahka nuan, nuan deka ke kurang birokasi enggau bepelasarka pechaya ke dikembuan kitai, kitai ulih sama angkat,” ku iya.
Dulu ari nya Abang Johari ngenang baru bekaul enggau rayat penyerakup nyadi pemun kena bekerejasama ngemansangka menua dalam penegap.
Menua sebedau pengawa bepilih besai ke-15 (PRU 15) diatur apin lama, ku iya, politik menua enda tegap lalu menua ngiga chara kena nyerakupka rayat Malaysia, kena ngangkatka Malaysia nyadi sebuah menua ti dikemegah enggau dipebasa menua bukai.
“Nya alai pengudah PRU apin lama gaya politik agi enda meruan kena numbuhka perintah, tang enggau lalau Agong, Malaysia patut numbuhka perintah ti tegap.
“Sereta Datuk Seri Anwar Ibrahim dipechaya ulih ngiring perintah sereta kitai Sarawak nyambut manah lalau (agong) nya.
“Aku pechaya enggau peneleba ke bisi ba YAB (Anwar) enggau kuing tauka tuju iya ti nyengenda, aku pechaya kitai deka ulih nyadika Malaysia nyadi menua ti tebilang baru ngena pengering ke dikembuan kitai.
“Kitai ukai semina deka ngangkatka nama kitai enggau bejalaika tanggungpengawa dalam landskap dunya kemaya hari tu tang mega nyadi sebuah menua ti dipebasa menua bukai,” ku iya.
Ngenang pekara ti sama, Abang Johari pechaya enggau sukung tegap ari GPS, Malaysia ulih nyapai nyadi menua ti dalam pemaik enggau pengelantang ari baruh iring pemesai ke diatu.
Iya meri pengarap ngagai Menteri Besai iya nya Sarawak dibelakang perintah penyerakup.
“Aku nemu nuan bisi peneleba maya nyadi sapit menteri besai. Aku agi ingat maya nuan bejadi jematan Satok ba taun 1998. Aku arap bendar enggau latar belakang sereta penemu ke dikembuan nuan, ukai semina Sarawak, tang sama begulai enggau Sabah, kitai ulih nempa pengeransing nyadi siti tim ke pemesai guna enggau penguntung menua Malaysia,” ku iya.