Agi ulih ngatur belanja taja menua betapi enggau krisis ekonomi, ngembuan pupu bansa tang agi ulih begulai manah
"Aku ke nyadi ketuai iya nya nyadi Menteri Besai, aku enda bebatak asur (senentang penyerakup) kena nyaga pengelikun enggau pengelantang sereta pemaik semua bansa enggau jalai pengarap di menua tu.
Datuk Seri Anwar Ibrahim
Menteri Besai
Dikarang Rengenyan Labang
KUCHING: Sarawak entara negeri di Malaysia ti pemadu tan sereta tegap ngatur penegap politik, penyerakup enggau belanja taja pan menua betapi enggau krisis ekonomi.
Menteri Besai Datuk Seri Anwar Ibrahim madah Sarawak mayuh bida pupu bansa tang nadai belaya tauka bemunsuh enggau pangan diri.
Nya alai ku iya bala bakih nyengkaum di Semenanjung enggau parti-parti politik ke enda nemu ngetu belaya patut belajarka reti peneleba penyerakup ari rayat Sarawak.
"Aku ke nyadi ketuai iya nya nyadi Menteri Besai, aku enda bebatak asur (senentang penyerakup) kena nyaga pengelikun enggau pengelantang sereta pemaik semua bansa enggau jalai pengarap di menua tu.
"Siti pekara bukai ti aku pansik(teliti) ari jauh enggau diatu semak, pekara ti dipejalaika Premier Sarawak (Datuk Patinggi Tan Sri Abang Johari Tun Openg) enggau bala pemesai di negeri Sarawak iya nya ngemeratka penegap politik ti nyadi pekara dikemerat dalam polisi ti ngangkatka tikas ekonomi Sarawak.
"Ambika banding, isu digital ti aku kemeratka nyadi pun ti pemadu besai, belanja enggau madani. Ba pekara tu, dipeda Sarawak jauh dulu lebih ke mua,” ku iya.
Anwar nyebut pekara nya lebuh bejaku ba Majlis Jamuan Negeri nyerumba penemuai iya nyadi Menteri Besai ke negeri tu, ti diatur ba BCCK ditu, malam ensanus.
Bejaku baru iya madahka, bekaul enggau ubah gaya hari, dalam timpuh 10 taun ke udah dibantaika pakar bekaul enggau hidrogen enggau pasal pengering tauka penegap hidrogen nyadi sumber energi baru.
“(Aku) Datai ke Sarawak, tadi bisi penerang ari Premier Sarawak pasal penyulut enggau nama chara ti dipejalaika di Sarawak bekaul enggau hidrogen. Aku meri tabi basa (salute) ngagai iya (Abang Johari) pasal pekara tu.
“Nya alai, aku meda enti entara menua di Semenanjung, Sabah enggau Sarawak, endang enda ulih dikeenggaika siti penerang, nama nya? Sarawak ngechul(muncul) di entara negeri ti pemadu tan sereta tegap (gagah) di Malaysia.
Nambah nya Anwar muji seraya meri pengarap tinggi ngagai Sarawak ngembuan sumber kewangan ti nyadi pengering tauka penabat ekonomi negeri tu.
“Aku udah tentu meri pengarap ti tinggi ngagai bala pemesai ditu laban Sarawak tu bisi pengering tauka penegap ekonomi.
“Bisi sekeda negeri enda ulih enda minta bantu perintah besai mayar gaji ketegal ti nadai sumber kewangan bukai, tang Sarawak datai ba tikas iya nya projek pelajar, projek pengerai, sepital enggau beberap rpojek perengka guna mensia mayuh dipejalaika ulih perintah negeri Sarawak,” ku iya.
Ngenang penemuai ke menua Indonesia, Anwar madahka Sarawak entara menua ti dikenang maya berandau empat mata enggau Presiden Indonesia, Joko Widodo (Jokowi).
Ku Anwar, Sarawak disebut penegap enggau pengering iya nya dalam meranakka puku ke Indonesia nyengkaum Indu Menua baru Indonesia iya nya Nusantara.
“Patut iya aku maya nemuai betemu enggau Jokowi patut mai Premier Sarawak laban Sarawak entara siti tajuk ke pemadu beguna dalam randau aku enggau Jokowi,” ku iya.
Nambah nya maya nerima penemuai basa Sultan Brunei beberapa hari udah nyadi Menteri Besai, sereta entara pekara dikerandau bisi disebut mega pemesai guna nempa kaul Bruneo enggau Sarawak, ku iya seraya madah diri nyukung penuh pekara nya.
Sama bisi ba pengerami nya kemari, Premier Sarawak Datuk Patinggi Tan Sri Abang Johari Tun Openg, Sapit Menteri Besai Datuk Seri Fadillah Yusof, Sapit Premier Sarawak Datuk Amar Douglas Uggah Embas enggau Dato Sri Dr Sim Kui Hian, bala menteri kabinet perintah besai enggau negeri sereta sida ke bukai.