Dalam pengawa ngemeran enggau ngangkatka penyerakup, pemaik sereta pengelantang pupu raban bansa
"Pemadu beguna iya nya penyerakup ke diguna semua kitai ke chukup kitai hargai. Penyerakup ke ulih dipeda kitai ba sekula primari China nyadi rangkat tanda juluk Sarawak 2030.
Dato Sri Dr. Sim Kui Hian
Sapit Premier Sarawak
KUCHING: Perintah negeri chukup bebendar nyukung sekula China laban iya terus ngemeran enggau ngangkatka penyerakup enggau pemaik sereta pengelantang entara semua bansa, ku Sapit Premier Sarawak, Dato Sri Dr. Sim Kui Hian.
Ku iya, perintah negeri kenyau ari jeman Datuk Patinggi Adenan Satem tauka Tok Nan seruran nyukung sekula primari China laban ba tiap buah sekula primari China nembiak iya ukai semina China Sarawak tang semua bansa.
"Pemadu beguna iya nya penyerakup ke diguna semua kitai ke chukup kitai hargai. Penyerakup ke ulih dipeda kitai ba sekula primari China nyadi rangkat tanda juluk Sarawak 2030.
"Sarawak 2030 deka nyadi inklusif, deka nyadi pemadu lantang enggau dalam pemaik, tang kitai enggai Sarawak nyadi kaya enggau nyadi polarisasi enggau memecahbelahkan.
"Enti kita meda enda ngira menua bukai ti bepechah tauka nadai penyerakup, beperang, enda ngira pengaya sida, semua orang merinsa," ku iya madah ngagai pengarang berita pengudah bejadi muka blok akademik baru SJK Chung Hua Batu 35 Serian kemari.
Dr Sim madaha pejalai pengelama 85 taun SJK Chung Hua Batu 35 Serian iya nya enda mudah tang sepemanjai 85 taun tu sida udah nempa mayuh orang bepengelandik ti sama ngemansangka Sarawak enggau menua.
Ku iya, penemu blok akademik baru nya ngayanka semangat beserakup staf SJK Chung Hua Batu 35 Serian.
"Sepuluh taun ke udah, tanah endur sekula tu udah nyadi tanah negeri.
"Tang sehari tu, ketegal pengeliat enggau laban bakani semua orang beserakup, kitai ukai semina ulih ngetanka sekula tang kebendar iya ngerembaika agi sekula tu," ku iya.
Ku Dr. Sim, Sarawak, enti sekula nya nyereminka nilai penyerakup, perintah negeri deka nyukung sida laban anak ba sekula nya jemah ila deka nyadi pemesai ke ngiring negeri.
Kena negika penyerakup ku iya, perintah negeri deka terus bebendar, baka ti dipadahka Premier, ari baruh perintah baru deka ngembuan autonomi jalai pengarap, pengerai enggau pelajar.
"Tu amat beguna ngagai Sarawak laban kitai enggai ke Sarawak ti pemadu jaya lebuh manggai taun 2030 tang semua orang belaya.
"Kitai deka nyadi kaya enggau semua orang ulih ngasaika, ukai belaya," ku Dr. Sim ti mega Menteri Pengerai Mensia Mayuh, Pengawa Berumah enggau Kaunsil Kandang Menua Sarawak.