Tu mega ulih meransang tikas inovasyen, kreativiti sereta besemekih enggau manah ungkup sebuah menua
“Komponen orang dagang ti dipasukka nengah aktiviti karnival baka tu ulih nentuka nembiak Universiti Puta Malaysia Kampus Bintulu (UPMKB) ngembuan runding ti kritis, kreatif dalam ngayanka potesial diri nengah chara praktikal sereta ngembuan pengerindu dalam bidang orang dagang,”
Dr Sharon Ong
Fasilitator Program Putra Uptown 2022
BINTULU: Aktiviti orang dagang iya nya penyungkak ngagai pemansang ekonomi ti ulih nyadi pekara ti besai dalam ngangkatka tikas inovasyen, kreativiti sereta besemekih sebuah menua.
Pengelandik nyadi orang dagang iya nya siti ari pengelandik ti endang diperansang dalam palan pelajar tinggi dikena ngadaka modal mensia ti bisi kualiti, inovatif enggau kreatif.
“Komponen orang dagang ti dipasukka nengah aktiviti karnival baka tu ulih nentuka nembiak Universiti Puta Malaysia Kampus Bintulu (UPMKB) ngembuan runding ti kritis, kreatif dalam ngayanka potesial diri nengah chara praktikal sereta ngembuan pengerindu dalam bidang orang dagang,” ku Fasilitator Program Putra Uptown 2022 Dr Sharon Ong madah.
Berindik ari nya, ku iya, kaul bala nembiak ari Kus Kokurikulum Bekredit QKH2104 Usahawansiswa ti ngena inisiatif meransang Program Putra Uptown 2022 di Kolej Sri Rajang UPMKB tu endang siti pekara ti chukup manah.
Ku iya, Putra Uptown 2022 iya nya program aktiviti karnival ti ngena konsep bedagang ke ngempuru penyereta ari bala nembiak sereta komuniti di Bintulu.
“Mayuh macham bansa bansa pemakai sereta pemerindang baka karaoke, pekit Mobile Legends Bang Bang (MLBB) sereta main bukai bisi disediaka,” ku iya nerang.
Pia mega, Direktor Program Putra Uptown 2022 Afdhal Ilhami Afdhal Lufti madah, program tu mujur nyapai juluk batang tuju iya nya nyendiaka platform ngagai nembiak UPMKB bedagang, nambahka penemu bekaul ngatur program sereta bedagang ungkup bala nembiak UPMKB.
Ku iya, pesereta, pedagang enggau orang ti datai meri timbal tauka respon ti positif ngagai program tu ke lalu ngarapka program tu ulih diatur agi enggau kerejasama raban bukai sereta bisi mantaika mayuh macham aktiviti program.