KUCHING: Sarawak patut bisi dipasukka perintah besai dalam 'Agenda Bandar Baru' awakka ulih meransang pemansang mengeri pintar enggau nempa komuniti pintar.
Sapit Premier Sarawak, Dato Sri. Dr Sim Kui Hian madahka, nya dikena nentuka Sarawak enda tinggal dalam pemansang ke lebih agi bekaul enggau Sempekat Malaysia 1963 (MA63).
Menteri Pengerai Mensia Mayuh, Pengawa Berumah, enggau Kaunsil Kandang Menua bepenemu ari segi pemansang negeri tu patut ulih setipak enggau Semenanjung Malaysia.
"Kitai mega ngarapka lebih mayuh projek pemansang ari perintah besai enda lama agi dikena nentuka Sarawak enda tinggal dalam pemansang ke patut, ke lebih agi ti ari baruh MA63. Pemansang kitai mesti setipak enggau pemansang di Semenanjung Malaysia.
"Sida (perintah besai) mesti ngemasukka kitai dalam Agenda Bandar Baru ari baruh Opis Menteri Pengawa Berumah enggau Kaunsil Kandang Menua Perintah Besai ti meransang pemansang mengeri pintar enggau ngadaka komuniti pintar.
"Pemansang mengeri PINTAR(SMART Cities) deka ngubah (transform) chara raban bekuasa kandang menua bejalaika pengawa sida ninting hari (day-to-day business)," ku iya.
Dr. Sim madahka pekara nya lebuh iya bejaku ba pengerami Anugerah Perkhidmatan Cemerlang, Opis Menteri Pengerai Mensia Mayuh, Pengawa Berumah, enggau Kaunsil Kandang Menua (MPHLG) ti diatur ba sebengkah hotel ditu, kemari.
Bejaku baru iya madahka, seraya nerima teknologi pemadu baru ngambika lebih efisyen enggau entap, sistem mengeri dipelaba dikemanahka agi kena nentuka alai endur diau lebih likun enggau bepengerai.
Nambah nya ku iya, raban bansa ari baruh kandang endur ti dipegai pihak berkuasa tempatan deka ngembuan jangka ti lebih tinggi sereta sama ngambi bagi enti kaul lebih manah enggau ngerembai.
Dulu ari nya iya madahka perintah negeri udah nyikap diri betapi pemari pengudah COVID-19 nengah Strategi Pemansang Pengudah COVID-19 2030 (PCDS 2030), ti enggau tuju ngambika 'inklusif' iya nya tiap iku rayat Sarawak deka bisi peluang ngambi bagi dalam pemansang sereta ngasaika pengagaya ti diagihka nengah peluang gawa enggau dagang.
"Nya alai aku ngarapka opis menteri (MPHLG) kitai tu patut terus ba baris ke dimua dalam bejalaika PCDS kena nentuka Sarawak nyapai status negeri moden, maju enggau bepenatai pemisi lebuh manggai 2030.
"Aku minta Opis Menteri (MPHLG) enggau ejensi kitai ngemanahka agi pelin strategik diri empu enggau ngemasukka semua teras enggau inisiatif PCDS 2030 kena ngemaruka pelin bejalaika pengawa kita enggau perintah Sarawak," ku iya.
Kelimpah ari diberi basa nyuaka APC ungkup taun 2021 ngagai 320 iku pemesai(pegawai) ari Jabatan Pembentungan Sarawak, Perbadanan Perumahan Sarawak, enggau 24 PBT, Dr. Sim, mega diberi awak bejadika Buletin MPHLG.
Buletin MPHLG ti keterubah tu deka nyadi platform komunikasyen kena mandangka semua penyulut opis menteri nyengkaum semua ejensi ari baruh iya, kelimpah ari ngambika mensia mayuh ulih meretika tanggungpengawa enggau guna opis menteri.
Sama bisi datai ba pengerami tu kemari, Sapit Menteri iya, Datuk Dr. Penguang Manggil enggau Michael Tiang Ming Tee, Sekretari Mendam MPHLG Datu Antonio Kahti Galis enggau bala pemesai ke bukai.