KUCHING: Pengereja pengawa ba opis perintah negeri Sarawak deka nerima insentif khas sebulan setengah gaji pokok tauka minima RM2,000, sereta deka dibayar sebedau ujung taun tu.
Premier Sarawak, Datuk Patinggi Tan Sri Abang Johari Tun Openg madahka, insentif khas nya kena perintah ngelai komitmen pengereja pengawa opis perintah ba negeri tu ke udah bejalaika tanggungpengawa enggau profesional sepemanjai taun.
“Enggau tu, perintah Gabungan Parti Sarawak (GPS) udah ngaga pemutus mayar insentif khas sebulan setengah (satu setengah bulan) gaji pokok tauka minima RM2,000 ngagai pemesai tauka pengereja pengawa opis perintah negeri Sarawak, enggau deka dibayar sebedau ujung taun tu.
“Kitai mega deka mayar insentif khas ngagai urung 137,000 pengereja pengawa opis perintah ti gawa di Sarawak sepenyampau RM500,” ku iya.
Iya ti mega Menteri Wang enggau Ekonomi Baru mantaika pekara nya lebuh ti nyimpul jurai Aum Ketiga Penggal Keterubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari.
Dulu ari nya iya madahka, taun baru Sarawak deka ngerami 60 taun Sarawak begulai enggau Sabah sereta Malaya dalam numbuhka Malaysia.
Iya madahka Sarawak deka ngatur mayuh bengkah program enggau aktiviti kena ngitu 60 taun penumbuh Malaysia.
“Kitai untung laban ngasaika mayuh penguntung pemansang ke lebih agi dalam bidang ekonomi, pelajar, pengerai enggau pengelikun.
“Nya alai, aku minta semua rayat Sarawak ngambika beserakup nentuka penyerakup dalam mayuh bengkah pekara ti ngerami Malaysia ke mayuh pupu bansa, enggau jalai pengarap.
“Aram kitai nyadika Sarawak nyadi kandang menua ti maju enggau dalam pemaik ke pengelantang semua,” ku iya.