Anda di sini

Sarawak, perintah besai terus begulai ke penegap politik enggau ekonomi menua

Advertisement

Perintah nengeri tu ngarapka DSAI ulih ngamatka peminta hak Sarawak

Abang Johari nunjukka teks jaku iya ke dipejuraika maya nyimpul jurai ba Aum Ketiga Penggal Keterubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari. -Gambar Muhammad Rais Sanusi
Abang Johari nunjukka teks jaku iya ke dipejuraika maya nyimpul jurai ba Aum Ketiga Penggal Keterubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari. -Gambar Muhammad Rais Sanusi

“Pengari kitai dalam Perintah Penyerakup deka nentuka semua polisi enggau inisiatif perintah besai deka ngemeratka pengelantang pendiau rayat enggau status, hak enggau pemerat Sarawak dalam perintah besai setipak engau hak konstitusyen kitai ari baruh Sempekat Malaysia 1963 enggau Ripot IGC,”

Datuk Patinggi Tan Sri Abang Johari Tun Openg 
Premier Sarawak


Dikarang Rengenyan Labang 

KUCHING: Perintah Penyerakup ari baruh pegai Menteri Besai ke-10 Datuk Seri Anwar Ibrahim dikearapka ulih bejalaika pemansang enggau hak ke dipinta Sarawak ulih dikeamatka setipak enggau pengeransing penyerakup dalam Malaysia.

Premier Sarawak ti mega Menteri Wang enggau Ekonomi Baru, Datuk Patinggi Tan Sri Abang Johari Tun Openg madahka, ari baruh Perintah Penyerakup, perintah Sarawak deka bekerejasama enggau perintah besai kena nentuka politik ti tegap enggau pengelantang ekonomi menua.

“Nama ke dikearapka kitai di Sarawak iya nya ngambika penumbuh Perintah Penyerakup ari baru iring iya (Datuk Seri Anwar Ibrahim), mayuh pemansang ulih dipejalaika enggau semua hak ke dipinta baru Sarawak ulih dipenuhi demi semangat penyerakup dalam Malaysia.

“Pengari kitai dalam Perintah Penyerakup deka nentuka semua polisi enggau inisiatif perintah besai deka ngemeratka pengelantang pendiau rayat enggau status, hak enggau pemerat Sarawak dalam perintah besai setipak engau hak konstitusyen kitai ari baruh Sempekat Malaysia 1963 enggau Ripot IGC,” ku iya.

Iya ti mega Menteri Pengeraja Asal enggau Pemansang Mengeri madahka pekara nya lebuh ti nyimpul jurai ba Aum Ketiga Penggal Keterubah Aum Kunsil Negeri Sarawak ke-19 ke diatur ba Kompleks DUN Sarawak ditu, kemari.

Dulu ari nya iya madahka GPS udah mujur bejalaika tanggung pengawa milih perintah besai nengau Pengawa Bepilih Besai Ke-15.

Iya madahka taja pan bisi penanggul nyadi pengudah pengawa bepilih besai tang mujur diputarka enggau manah baka ti diungkupka dalam Perlembagaan menua.

Tu ngayanka institusyen Perintah bepelembagaan Malaysia iya nya tonggak kedaulatan menua ke patut disukung, ku iya.

Lalu nyadi rayat Malaysia ti talukka Agong, perintah GPS udah pechaya pemutus Agong enggau Majlis Raja-Raja Melayu ba tanggung pengawa nyirika Menteri Besai Malaysia ke-10 engau udah nya numbuhka Perintah Penyerakup.

“Tu ngayanka perintah GPS nyadi model perintah ti seruran menjunjung prinsip Rukun Negara, iya nya ‘Kepercayaan kepada Tuhan; Kesetiaan kepada Raja dan Negara; Keluhuran Perlembagaan; Kedaulatan Undang-Undang; enggau Kesopanan dan Kesusilaan’,” ku iya.
 

Advertisement