Dalam pengeransing ngangkatka pengelantang pendiau rama sereta ekonomi peranak di kandang menua tu
“Program tu (RTP) mekuh ngagai bejalaika projek ‘people-centric’ baka jalai kampung, masjid, tokong, gerija, balai mayuh guna, kereban rekresyen enggau ke bukai ti terus meri penguntung ngagai raban bansa,”
Datuk Amar Douglas Uggah Embas
Sapit Premier Sarawak
Dikarang Rengenyan Labang
KUCHING: Projek Transformasyen Menua Pesisir (RTP) deka terus nyadi siti ari inisiatif besai mai transformasyen ngagai kandang menua pesisir kena ngangkatka pengelantang pendiau rama enggau ekonomi raban bansa menua pesisir.
Sapit Premier Sarawak ti mega Menteri Wang enggau Ekonomi Baru Kedua, Datuk Amar Douglas Uggah Embas madahka, ba taun 2021 enggau 2022 bisi 5,222 projek RTP udah dikemendarka.
Lalu ari semua (5,222) projek ke udah dikemendar nya, ku iya, bisi 4,120 projek udah tembu digaga enggau 1,102 projek agi benung dalam mayuh renggat dipejalaika.
“Kenyau ari (RTP) diberi kelala dalam taun 2016, bisi 17,902 projek RTP udah dipejalaika enggau ungkus belanja perintah sepenyampau RM2.51 bilion.
“Program tu (RTP) mekuh ngagai bejalaika projek ‘people-centric’ baka jalai kampung, masjid, tokong, gerija, balai mayuh guna, kereban rekresyen enggau ke bukai ti terus meri penguntung ngagai raban bansa,” ku iya.
Iya madahka pekara nya lebuh ti nyimpul jurai Opis Menteri Wang enggau Ekonomi Baru ba Aum Ketiga Penggal Keterubah Aum Kunsil Negeri Sarawak Ke-19 ti diatur ba Kompleks DUN Sarawak ditu, kemari.
Nambah nya lebuh ti ngenang Projek Rakyat, bisi 532 projek udah dikemendarka ba taun 2021 enggau 2022, sereta ari penyampau nya bisi 200 projek udah tembu enggau 332 projek agi dalam mayuh renggat dipejalaika.
“Ari baruh Langgur Pemansang Malaysia Lumpar Ke-12 (RMK12), sepenyampau RM659.87 juta udah dibelanjaka naka bulan Oktober 2022.
“Kenyau ari ditumbuh tauka diberi kelala dalam taun 2019, sepenyampau RM1.39 bilion udah dipelanja naka ke diatu,” ku iya.