Anda di sini

Ordinan Adat Istiadat 1977 enggau 1996 patut diubah

Advertisement

Ambika MAIS ulih bejalaika pengawa nyadi sebuah opis korperat ke mai empas ti manah, ku Sikie

Sikie mandangka teks kena iya nyimpul jurai ungkup Opis Premier Sarawak ba aum DUN Sarawak, kemari. - Gambar Muhammad Rais Sanusi
Sikie mandangka teks kena iya nyimpul jurai ungkup Opis Premier Sarawak ba aum DUN Sarawak, kemari. - Gambar Muhammad Rais Sanusi

Dikarang Rengenyan Labang

KUCHING: Ordinan Adat Istiadat 1977 enggau Ordinan Adat Isitiadat (Declaration) 1996 patut dipansik baru enggau diubah nitihka pematut.

Menteri ba  Opis Premier Sarawak, Datuk John Sikie Tayai madah, maya Opis Kunsil Penyimpan enggau Penusun Adat Negeri Sarawak (MAIS) udah ditumbuhka dalam taun 1972 tuju nya dikena nyaga, asil ngumpul sereta nusun enggau ngelakuka adat orang asal di Sarawak.

Dalam taun 1974 nyentuk ke sehari tu, ku iya, pengawa MAIS nyadi sebuah unit ari baruh Opis Kepala Menteri maya nya suba, lalu pengudah sejarah panjai pengelama setengah abad, MAIS berengkah nyadi korperat kaunsil.

“Pengudah dikorperatka, pengawa ngatur MAIS nadai tatak nentuka tusun kereja ninting hari Kaunsil nya nyengkaum baka ngambi pemesai enggau ngelanggur pengawa ke deka dikereja jemah ila.

“Nya alai, ambika MAIS ulih bejalaika pengawa nyadi sebuah opis korperat ke mai empas manah, Ordinan Adat Istiadat 1977 enggau Ordinan Adat Istiadat (Declaration) 1996 patut dipansik baru sereta diubah nitihka pematut,” ku iya.

Sikie mansutka pekara nya lebuh nyimpul jurai ungkup Opis Premier Sarawak ba Aum Ketiga Penggal Keterubah Aum Kunsil Negeri Sarawak ke-19 ti diatur ba Kompleks DUN Sarawak ditu, kemari.

Dulu ari nya, iya madahka penumbuh MAIS baka digaga ari baruh Ordinan MAIS 1977, iya nya nyadi sebuah opis gerempung ti terus bisi belama, lalu berindik ari pekara nya, MAIS benung nyikap diri ngamatka juluk nya.

“Kereja mali iya nyadi opis korperat benung dipejalaika setipak enggau pelin strategik MAIS 2022 nyentuk 2026.

“Entara langgur penemu ke nyengenda benung dipunka MAIS iya nya numbuhka institut pemansik bekaul enggau adat mayuh bengkah etnik.

“Institut tu deka ngenegapka agi penuduk nyadi ejensi ke meri fokus bekaul enggau adat enggau main asal orang asal,” ku iya.

Program tu mega deka meri peluang ngagai MAIS ngena penuh kapasiti pengawa mansik ba pemansang enggau ngelakuka adat asal, ku iya, kelimpah ari nyadi platform nyaga, nempa enggau ngelakuka adat enggau main asal bansa asal.

Advertisement