Anda di sini

Nengeri Sarawak kurang lutur pelatih baru, ku Tiang

Advertisement

Tu diperatika dalam timpuh tiga taun ti ngayanka trend nurun, pengawa nentuka palan ngeripot diri gawa diatur KKM

Tiang (kiba) maya datai ba Aum DUN, kemari. -Gambar Muhammad Rais Sanusi
Tiang (kiba) maya datai ba Aum DUN, kemari. -Gambar Muhammad Rais Sanusi

“Bepelasarka data kami, penyampau lutur pelatih baru ti ngeripot diri ba Sarawak bisi ngayanka trend nurun.

Michael Tiang 
Sapit Menteri Pengerai Mensia Mayuh, Pengawa Berumah enggau Kaunsil Kandang Menua

Dikarang Rengenyan Labang

KUCHING: Penyampau lutur pelatih baru ti ngeripot diri gawa di Sarawak bisi ngayanka trend nurun.

Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Michael Tiang madahka, pekara nya bepelasarka perati dalam timpuh tiga taun.

Iya madahka pekara bekaul enggau ngatur nganjung tauka nentu lutur pelatih baru nya diatur Opis Menteri Pengerai Malaysia (KKM) gawa ba Sarawak.

“Bepelasarka data kami, penyampau lutur pelatih baru ti ngeripot diri ba Sarawak bisi ngayanka trend nurun.

“Ba taun 2020, bisi 270 iku lutur pelatih, 222 iku (2021) enggau bisi 158 iku lutur pelatih baru.

“Tu engka ketegal sistem penempatan(placement) baru ti diterima sereta dikena KKM ti ngemendarka graduate perubat baru milih sepital alai sida iya belatih,” ku iya.

Tiang madahka pekara nya lebuh ti nyaut tanya tambah ari Datuk Ibrahim Baki (GPS-Satok) ba Aum Ketiga Penggal Ketrubah Aum Kunsil Negeri Sarawak Ke-19 ke diatur ba Kompleks DUN Sarawak ditu, kemari.

Dulu ari nya, Tiang lebuh ti nyaut bekaul enggau kes 'buli' lutur pelatih enggau lutur biak (doktor muda) ba sepital Sarawak, iya madahka, Independent Healthcare Work Culture Improvement Taskforce ditumbuhka KKM kena 17 Ogos 2022 berindik ari dua kes ke diripotka di Sarawak sereta udah dipansik enggau diputarka.

Iya madahka, kena nyeliahka kes nyadi baru Opis Pengerai udah  ngatur aum nitihka timpuh ditetapka ungkup lutur pelatih enggau Direktor Sepital.

“Tu deka meri peluang ngagai lutur pelatih ngenataika sebana sida ngagai SCHOMOS (Section Concerning House Officer, Medical Officers and Specialists) enggau Gerempung Perubat Malaysia (MMA).

“Opis kaunseling dan psikiatri mega deka sama ngambi bagi nyendiaka sukung runding(mental) ungkup semua pekereja nyaga pengerai. Kelimpah ari chara nagang ke udah bisi, KKM bisi udah bejadika saluran(channel) sebana buli ba endur gawa ngena chara online.

“Tu salur tambah ti meri awak ngagai sida ke ngeripot tauka sebana bekaul enggau buli ba endur gawa terus ngagai Unit Integriti KKM,” ku iya.

Advertisement