KUCHING: Perintah Sarawak benung ngemansangka Mukah nyadi Bandar Pintar, ti lalu dikena muka peluang gawa enggau nyungkakka ekonomi di negeri tu, ke lebih agi di Bagi menua Mukah.
Sapit Menteri Dagang Antarabansa, Industri enggau Pemeranak Puku, Datuk Malcom Mussen Lamoh madah, kena nyapai juluk nya perintah udah ngelala lapan bengkah sektor ekonomi deka dikemansangka di Mukah.
“Kena muka mayuh kereja puang di Sarawak, kelebih agi di Bagi menua Mukah, perintah Sarawak benung bebendar deka ngemansangka Mukah nyadi Bandar Pintar.
“Berindik ari pekara nya,lapan sektor ekonomi udah dikelala sereta deka terus dikemansang kena numbuhka pengawa puang di Mukah.
“Lapan sektor nya nyengkaum, sektor pelajar, nengah pengawa numbuhka hab pelajar kena ngatur aktivti mansik enggau ngemansang sereta nyadi palan latih pengereja pengawa ti bepengelandik,” ku iya.
Mussen nerangka pekara nya lebuh ti nyaut tanya ari Royston Valentine (GPS-Tellian) ba Aum Ketiga Penggal Keterubah Aum Kunsil Negeri Ke-19 ke diatur ba Kompleks DUN Sarawak ditu, kemari.
“Nambah nya, sektor komunikasyen enggau teknologi ti nyadi industri pelasar kena numbuhka Bandar Pintar enggau pemansang ekonomi digital,” ku Mussen.
Ku iya, sektor bukai ke dikelala sereta dikemansangka di bagi menua Mukah mega nyengkaum sektor betanam betupi, bioteknologi, berikan enggau main asal.
“Kelimpah ari nya sektor barang pemakai nengah chara ngemansangka 'Food City' ungkup aktiviti kena nyungkak pemanah utai tanam enggau tupi, udah bisi di Mukah.
“Tuju tu kena ngemansangka industri mit enggau jelan pemesai bepelasarka barang pemakai ba kandang menua tengah Sarawak.
“Sektor begaga mega dikemansangka ba kandang endur insutri Matadeng kena nangkup peminta guna industri produk,” ku iya seraya madahka sektor begaga mega deka dikemansangka di Mukah.
Nambah nya, ku iya, kena nyungkak pemansang ekonomi ba kandang menua Mukah, Mussen madahka entara kereban ke udah digaga kena nyukung aktiviti sosio-ekonomi enggau matak pemeranak puku nyengkaum dua loji kuasa arang batu, padang bilun baru Mukah enggau ke bukai.
Kelimpah ari nya, opis menteri mega bisi nyendiaka infrastruktur dagang kena ngenyakahka agi aktiviti industri enggau orang dagang di Bagi menua Mukah.
“Bisi tiga projek 'Anjung Usahawan' benung dalam perambu deka dikemansang ba Bagi Menua Mukah iya nya Anjung Usahawan Balingian, Anjung Usahawan Daro enggau Anjung Usahawan Dalat enggau siti projek Taman Industri Mini ba pelilih menua Dalat.
“Nengah pengawa ngaga projek tu, nya deka nyendiaka mayuh agi peluang dagang baru enggau peluang gawa ngagai anak menua tu empu seraya nyungkak tikas ekonomi peranak di bagi menua Mukah,” ku iya lebuh ti nyaut tanya tambah ari Royston.