Anda di sini

Skim Duit Jali Rumah Panjai patut ditikika RM50,000 sepintu

Advertisement

Agih belanja ninting taun mega patut ditambah laban barang ungkup pengawa berumah majak niki rega

 John lebuh bejuraika Bajet (2023), 2022 ke dibantaika Premier Sarawak. -Gambar Muhammad Rais Sanusi
PATUT DITAMBAH: John lebuh bejuraika Bajet (2023), 2022 ke dibantaika Premier Sarawak. -Gambar Muhammad Rais Sanusi

“Laban rega barang tauka kereban dikena ngaga enggau gaya diatu, nya alai dipinta ngambika perintah nikika penyampau ari RM30,000 ngagai RM50,000 sepintu enggau ungkup belanja tiap taun ditambah.

John Ilus
ADUN Bukit Simuja


Dikarang Rengenyan Labang 

KUCHING: Skim Duit Jali Rumah Panjai patut ditikika ngagai RM50,000 sepintu enggau ungkup belanja tiap taun ditambah.

John Ilus (GPS-Bukit Simuja) madahka nya berindik barang tauka kereban ke diguna ngaga rumah majak mar.

Ku iya dalam inisiatif ke 4 ba bajet 2023, pekara ti bekaul Skim Loan Rumah Panjai ti semina ngungkupka sepenyampau RM50 juta ba taun 2023, enggau penyampau dijali semina RM30,000 sepintu.

“Laban rega barang tauka kereban dikena ngaga enggau gaya diatu, nya alai dipinta ngambika perintah nikika penyampau ari RM30,000 ngagai RM50,000 sepintu enggau ungkup belanja tiap taun ditambah.

“Minta mega ngagai perintah negeri  ngambi nyendiaka siti model bantu ti sebaka enggau program Spektra Permata ti nitihka chuan negeri t uke lebih agi sida ke diau ba tanah NCR ke nadai geran,” ku iya.

John mansutka pekara nya lebuh ti bejuraika Bajet (2023), 2022 maya Aum Ketiga Penggal Keterubah Aum Kunsil Negeri Sarawak Ke-19 ke diatur ba Kompleks DUN Sarawak, kemari.

Ku iya bepenemu, chara nya deka ulih mantu perintah negeri mutarka penanggul pengawa berumah ke lebih agi ungkup raban biak tauka sida ke baru nirika ruang bilik.

Kelimpah ari nya Johh minta perintah negeri berunding nambahka ketuai raban bansa dalam Kunsil Negeri (DUN) Bukit Simuja, ti nyengkaum ungkup raban bansa Iban enggau Melayu.

Iya madahka peminta nya suah udah dikenatai sereta dipinta maya baum Kunsil Negeri.

“Aku minta amat-amat ngagai perintah Sarawak ngambi nambahka Temenggong bansa Melayu enggau Pemanca bansa Iban ba sitak Serian.

“Utai tu udah lama sereta suah dikejaku maya baum DUN. Tang sampai diatu pekara tu bedau disaut perintah. Aku ngarapka pekara tu ulih diatur, awakka kami ulih sebaka enggau bansa bukai tauka ba endur bukai,” ku iya.
 

Advertisement