KUCHING: DAP minta ampun berindik ari penerang ketuai parti nye ke sebedau tu udah ngasuh ati perintah enggau rayat Sarawak ensiban.
Ampun nya dikenataika Sekretari Besai DAP Anthony Loke Siew Fook ngagai Premier Sarawak Tan Sri Abang Johari Tun Openg lebuh ke betemu enggau Abang Johari ba rumah iya ditu, kemari.
Nengah penerang ba media sosial iya kemari, Loke madahka pekara nya udah dikerandau enggau manah sereta bisi digulu Sapit Premier Sarawak, Datuk Seri Dr Sim Kui Hian.
“Aku ngarapka pengawa betemu hari tu deka muka siti lambar baru kena nempa pemereti ati enggau kerjasama ungkup menua Malaysia ambika lebih maju sereta progresif,” ku iya.
Berebak enggau nya, siku pemesai Abang Johari ngenukuka pasal sida ke betemu nya tang enda ulih madah enggau silik pekara ti dirandau kedua-dua piak.
Kemari, Abang Johari, Chairman GPS ke mega Presiden Parti Pesaka Bumiputera Bersatu (PBB) udah mendingka penerang ari Mandal Presiden Kanan Parti Pesaka Bumiputera Bersatu (PBB) Datuk Seri Fadillah Yusof ke dulu ari tu udah nyadi ketuai raban GPS betemu enggau Yang di-Pertuan Agong Al-Sultan Abdullah Ri’ayatuddin Al-Mustafa Billah Shah.
Pengudah meri penerang nya ba opis Premier Sarawak ba begunan Kunsil Negeri ditu, Fadillah madahka GPS udah diberi Al-Sultan Abdullah jaku tangkan ambika berundingka pengawa numbuhka perintah penyerakup kena ngetuka penyarut politik ke benung nyadi di menua diatu.
GPS, gempung empat parti ari negeri Sarawak iya nya Parti Pesaka Bumiputera Bersatu (PBB), Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP) udah menang 23 ari 31 kerusi Parlimen di negeri nya maya PRU15.
Chairman DAP menua,Lim Guan Eng mega madahka diri minta ampun ngagai Abang Johari enggau Perintah Sarawak nengah siti mutai ke ditulis iya dalam Facebook.
Ku Lim madah, gaya menua jemah ila beguna agi, lalu iya ngarapka nengah pengawa minta ampun nya tau nyadi pemun baru kena nempa kerejasama.
"(Kerejasama tu) deka nyaga mayuh bengkah utai, nerima sereta meri basa nyengkaum penyerakup sereta nerabai Konstitusyen Perintah Besai kitai ke pemaik semua," ku iya.
Berebak enggau nya di GEORGE TOWN, Chairman DAP Pulau Pinang Chow Kon Yeow madahka Loke ngereja pekara ke betul laban mulaika pemanah tanggam kaul enggau GPS nengah chara minta ampun sechara tebuka ambika ulih numbuhka perintah penyerakup.
Ku iya, Pakatan Harapan (PH) nguji numb uhka perintah penyerakup ke pemaik menua enggau rayat sereta ngengkahka agenda nasional ngelui ari parti enggau sida empu.
Berjaku ngagai pengarang berita ba luar Kunsil Negeri ditu kemari, Chow mega ngarapka ulah minta ampun sechara tebuka Loke nya, ulih ngemanahka kaul ba mayuh bengkahparti kelebih agi GPS di Sarawak enggau DAP nyengkaum PH, ti lalu mai asil ti dikedekaka PH enggau parti politik bukai kena numbuhka Perintah Besai.
Lebuh ditanya bakani kerjasama entara PH enggau Barisan Nasional (BN) ti deka numbuhka perintah besai, sekalika nya bisi meri empas ngagai negeri Pulau Pinang, ku iya, agi kelalau tumu bejaku pasal pekara nya sereta patut nelebaka diri enggau pengawa nyemelaka baru kuasa politik baru dalam menua.