Pengawa nyiri iya setipak enggau Pekara 40(2)(a) enggau Pekara 43(2)(a) Konstitusyen Perintah Besai
KUALA LUMPUR: Chairman Pakatan Harapan (PH) Datuk Seri Anwar Ibrahim kemari ngangkat sumpah mangku pengawa nyadi Menteri Besai Ke-10 ba mua Yang di-Pertuan Agong Al-Sultan Abdullah Ri’ayatuddin Al-Mustafa Billah Shah.
Istiadat Nyuaka Surat Chara Nyiri enggau Ngangkat Sumpah Mangku Pengawa sereta Taluk enggau Sumpah Naruh Resia nyadi Menteri Besai Ke-10 diatur ba Dewan Singgahsana Kecil, Istana Negara di tu pukul 5.06 lemai.
Al-Sultan Abdullah madahka pengawa nyiri nya setipak enggau Pekara 40(2)(a) enggau Pekara 43(2)(a) Konstitusyen Perintah Besai.
Istiadat angkat sumpah nya diatur pengudah Seri Paduka ngaluska penemu Raja-Raja Melayu bekaul enggau penatai sida ngulu Aum Khas Raja-Raja Melayu di Istana Negara pagi kemari, ambika ngaga pemutus ti pemaduh manah ke pemaik enggau pengelantang menua enggau rayat, lima hari pengudah pemutus rasmi Pengawa Bepilih Besai Ke-15 (PRU15).
Sama bisi ngulu istiadat nya, Raja Permaisuri Agong Tunku Hajah Azizah Aminah Maimunah Iskandariah.
Anwar, 75, ke bebaju Melayu chelum hitam lengkap besamping warna emas disempulang bini iya,Datuk Seri Dr Wan Azizah Wan Ismail, ke mega Kaban Parlimen Bandar Tun Razak.
Pengudah ngangkat sumpah, Kaban Parlimen Tambun nya lalu nyain beberapa iti dokumen ke bekaul sebedau nutup pengawa nya enggau sembiang ti betuaika Mufti Wilayah Persekutuan Datuk Dr Luqman Abdullah.
Bisi datai meda pengawa nya, Ketuai Akim Menua Tun Tengku Maimun Tuan Mat, enggau Ketuai Sekretari Menua Tan Sri Mohd Zuki Ali.
Enda tinggal mega,Peguam Menua Tan Sri Idrus Harun, Panglima Soldadu Jeneral Tan Sri Affendi Buang enggau Kepala Polis Menua Tan Sri Acryl Sani Abdullah Sani, Yang Dipertua Dewan Negara Tan Sri Dr Rais Yatim enggau Yang Dipertua Dewan Rakyat Tan Sri Azhar Azizan Harun.
Ketuai parti politik ke bisi datai iya nya bala ketuai parti komponen PH baka Sapit Presiden PKR Rafizi Ramli, Sekretari Besai DAP Anthony Loke, Presiden AMANAH Mohamad Sabu, Presiden UPKO Wilfred Madius Tangau.
Sama bisi mega, Chairman BN ke mega Presiden UMNO Datuk Seri Dr Ahmad Zahid Hamidi enggau Sapit presiden UMNO Datuk Seri Mohamad Hasan, bala anak enggau menantu Anwar.
Keterubah endar dalam sejarah menua, pemutus pengawa bepilih besai udah ngasuh Parlimen tegantung laban nadai parti tauka gempung parti politik bulih majoriti mudah kena numbuhka Perintah Besai. Majoriti mudah kena numbuhka perintah iya 112 kerusi.
Pemutus PRU15 ti diatur kena 19 November iya nya PH bulih 82 kerusi, PN 73 kerusi, BN (30); GPS (23), Gabungan Rakyat Sabah (6); WARISAN (3); Bebas (dua) lalu Parti Bangsa Malaysia enggau Parti Kesejahteraan Demokratik Masyarakat (KDM) sama menang siti kerusi.
Nitihka jaku Yang di-Pertuan Agong ambika parti enggau gempung politik berunding numbuhka perintah penyerakup kena ngetuka penyarut perintah pengudah PRU15, lalu asil ari randau entara parti udah setuju sereta nyukung numbuhka perintah penyerakup betuaika PH. - Bernama