KUCHING: Dr Johnical Rayong Nyipa (PSB-Engkilili) kemari minta Opis Pengawa Bepilih (SPR) untuk meresa baru pemutus undi ba Parlimen Lubok Antu maya Pengawa Bepilih Besai Ke-15 (PRU15) tu tadi.
Rayong ke mega chalun PSB di Lubok Antu maya PRU15 nya madah, iya udah ngenataika peakra nya ngagai SPR laban enda puas ati enggau pemutus nya kelebih agi undi majoriti ti semina 100 undi.
Iya mega madahka ba pemutus keterubah di parlimen iya ngenulu chalun bukai tang pengujung iya dipadahka alah enggau majoriti 100 undi.
Ba pengawa bepilih entara empat penyuru di Lubok Antu, chalun GPS ke mega manuk sabung baru, Roy Angau Gingkoi bulih 6,644 undi enggau majoriti 100 undi ngalahka tiga iku agi sida ke bukai, ke alai Rayong udah bulih 6,544 undi, Jugah Muyang ngarika Perikatan Nasional (PN) teulihka 5,360 undi enggau Langga Rias Pakatan Harapan (PH) semina teulihka 746 undi.
"Aku nyebut pasal pemutus PRU15 ba Parlimen Lubok Antu sereta deka madahka diri enda puas ati enggau pemutus majoriti 100 undi nya lalu aku minta SPR meresa baru pemutus nya.
"Lebuh pemutus nya dibantaika, aku minta ketuai SPR (RO) ngira baru tang enda dikemendarka, lalu nya alai aku minta baru SPR ambika berunding bejalaika atur ti patut kena nentuka pengamat pemutus nya," ku iya madah maya aum media begulai enggau Presiden PSB, Dato Sri Wong Soon Koh ditu, kemari.
Ku Rayong, iya bisi hak minta SPR ngitung undi nya baru laban majoriti nya kelalu mit, iya nya semina 100 undi.
Kelimpah ari nya, iya mega madahka Pom 14 mega enda disain Ejen Endur Ngundi enggau Ejen Ngira Undi (PACA) enggau betul.
Ku Rayong, ba Parlimen Lubok Antu bisi enda kurang ari 48 iti palan alai muai undi.
"Kami semina deka nemu penyampau pengundi, berapa iti undi rusak enggau berapa iti undi ditikalka, laban majoriti 100 undi nya kelalu mimit," ku iya madah nyemetak.
Ditanya sekalika iya udah ngeluarka petisyen, Rayong bmadahka iya deka ngeluarka petisyen dalam timpuh ke semak tu iya nya 21 haripengudah ngaga peminta nggai SPR.
Ba aum media ke sama, ku Wong, nyadi presiden parti iya deka meda proses demokrasi dipejalaika enggau chara ke patut.
"Ketegal nya Yang Berhormat (Johnical Rayong) minta SPR ngaga pengawa ke patutbekaul enggau justifikasi laban bida undi majoriti 100 undi n ya kelalu semak.
"Aku enda nemu sekali pengawa ngitung nya baru dikemendarka tauka enda. Taja pia, maya ngira undi (mantaika pemutus) iya minta undi nya dikira baru, tang dulak lalu ba aku pekara tu enda adil," ku Wong.