Ketegal nadai siku pan bulih sukung majoriti nyadi PM, Agong berunding deka numbuhka Perintah Penyerakup
“(Setuju numbuhka Perintah Penyerakup) Enti nya pemutus Agong, kami deka nurutka aja. Kami deka setuju.”
Datuk Seri Fadillah Yusof
Ketuai Whip GPS
Dikarang Rengenyan Labang
KUCHING: Gabungan Parti Sarawak (GPS) nurutka aja pengawa numbuhka Perintah Penyerakup nyema pekara nya diputuska Yang di-Pertuan Agong Al-Sultan Abdullah Ri’ayatuddin Al-Mustafa Billah Shah.
Ketuai Whip GPS, Datuk Seri Fadillah Yusof madahka GPS bepanggai ba asil randau entara parti, tang ke pemadu beguna GPS deka nurutka aja enda ngira nama pemutus ke digaga Agong.
“(Setuju numbuhka Perintah Penyerakup) Enti nya pemutus Agong, kami deka nurutka aja. Kami deka setuju,” ku iya lebuh dirandau raban pengarang berita ba Kompleks DUN ditu, kemari.
Mandal Presiden Kanan Parti Pesaka Bumiputera Bersatu (PBB) madahka pekara nya lebuh dipinta nerangka asil betemu enggau Yang di-Pertuan Agong Al-Sultan Abdullah Ri’ayatuddin Al-Mustafa Billah Shah di Kuala Lumpur, kemari.
Nambah nya, lebuh ke ditanya sekalika GPS deka bekerejasama enggau Pakatan Harapan (PH), Fadillah madah, GPS agi entap enggau penerang ke udah dipansutka sebedau tu, iya nya nganti sereta nurutka pemutus Agong.
Ku Fadillah, Aum Khas Raja-Raja Melayu deka diatur sehari tu ti dipelabaka deka berandauka pekara bekaul enggau nyiri Menteri Besai Ke-10.
“Pagila (sehari tu) Aum Raja-Raja deka diatur, ari nya bala Raja-Raja berandau, engka pengudah nya Raja-Raja deka berandau lalu ari nya engka deka diputuska, kami enda nemu. Nya kuasa Agong,” ku iya.
Dulu ari nya, Fadillah madahka lemai ensanus Agong minta pengari GPS betemu enggau iya ba Istana lalu pekara nya dikerandau enggau Premier Sarawak.
Ku Fadillah, ke bendar bisi lima iku pengari GPS dianjung betemu enggau Agong tang ketegal siku enda ulih ditelefon, nya alai semina empat iku aja iya nya aku empu enggau Datuk Seri Alexander Nanta Linggi ari Parti Pesaka Bumiputera Bersatu (PBB), Datuk Seri Richard Riot (Parti Rakyat Bersatu Sarawak) enggau Datuk Aaron Ago Dagang (Parti Rakyat Sarawak).
“Nya alai kami empat urung pukul 11.30 pagi tadi (kemari) betemu enggau Tuanku, lalu Tuanku udah meri jaku lalau madahka asai ati iya berindik ari nadai siku teulihka majoriti mudah ti tau disukung nyadi Menteri Besai.
“Iya (Agong) bisi juluk enti ulih kitai berandau lalu berunding sekalika tau ditumbuhka Perintah Penyerakup lalu ketegal nya Tuanku meri jaku lalau, penemu iya nama kebuah Perintah Penyerakup patut ditumbuhka.
“Aku tadi enda ulih ngaga sebarang pemutus laban kami mendingka penemu Tuanku sereta deka mai pekara tu ngagai ketuai renggat tinggi GPS. Tadi kami udah meri penerang ngagai YAB Premier Sarawak (Datuk Patinggi Tan Sri Abang Johari Tun Openg),” ku iya.
Nandu baru Fadillah madah, baka ke udah dipadah nengah penerang, GPS endang bisi ati ari segi sukung enti ulih numbuhka perintah begulai enggau sekeda parti.
Dulu ari nya, Abang Johari lebuh dirandau raban pengarang berita bekaul pekara ti dipadahka Fadillah ti baru pulai betemu enggau Agong di Kuala Lumpur bekaul pekara sapa ti numbuhka perintah enggau sapa Menteri Besai, iya madahka pekara nya agi dikerandau ba Istana di Kuala Lumpur.
“Kitai sama enda nemu. Sida iya agi berunding (nitihka padah Fadillah).
“(Kitai nganti pemutus Agong) Au,” ku iya nyaut enggau pandak lebuh dirandau raban pengarang berita pengudah ngulu Aum Ketiga Penggal Keterubah Kunsil Negeri Sarawak Ke-19 ba Kompleks DUN ditu kemari.