Anda di sini

Bidang betanam betupi terus dikemerat dalam PCDS 2030

Advertisement

Sarawak agi betapi enggau defisit timbang dagang barang pemakai, penyampau eksport nengeri tu bisi 29.8 peratus

Dr. Abdul Rahman madahka penambah defisit dalam timpuh lima taun ke udah iya nya sepenyampau 29.8 peratus, kemari. - Gambar Muhammad Rais Sanusi
Dr. Abdul Rahman madahka penambah defisit dalam timpuh lima taun ke udah iya nya sepenyampau 29.8 peratus, kemari. - Gambar Muhammad Rais Sanusi

“Nya alai, bidang betanam betupi udah nyadi entara ti dikemerat dalam Strategi Pemansang Pengudah COVID-19 2030 (PCDS 2030) ti enggau juluk deka nyadika Sarawak nyadi Net Food Exporter lebuh manggai taun 2030,” 

Datuk Dr. Abdul Rahman Ismail 
Sapit Menteri Industri Barang Pemakai, Komoditi enggau Pemansang Kandang Menua Sarawak

Dikarang Rengenyan Labang

KUCHING: Tikas penambah penyampau eksport barang pemakai Sarawak enggau timbang dagang (imbangan dagangan) kenyau lima  taun ke udah sepenyampau 29.8 peratus.

Sapit Menteri Industri Barang Pemakai, Komoditi enggau Pemansang Kandang Menua Sarawak, Datuk Dr. Abdul Rahman Ismail madahka, Sarawak diatu agi betapi defisit dalam timbang dagang barang pemakai.

Iya madahka, ba taun 2017, penyampau eksport iya nya RM1.02 bilion dibandingka enggau import RM4.61 billion ti ngujungka defisit sepenyampau RM3.59 bilion, Lalu ba taun 2021, penyampau eksport RM1.11 billion dibandingka enggau import RM5.77 bilion ti nyadika defisit RM4.66 bilion.

“Tu reti iya penambah defisit dalam timpuh lima taun ke udah iya nya sepenyampau 29.8 peratus.

“Nya alai, bidang betanam betupi udah nyadi entara ti dikemerat dalam Strategi Pemansang Pengudah COVID-19 2030 (PCDS 2030) ti enggau juluk deka nyadika Sarawak nyadi Net Food Exporter lebuh manggai taun 2030,” ku iya.

Abdul Rahman madahka pekara nya lebuh ti nyaut tanya Rolland Duat Jubin (GPS-Meluan) bekaul enggau pekara nya, ba Aum Ketiga Penggal Keterubah Kunsil Negeri Ke-19 ke diatur ba Kompleks DUN ditu, kemari.

Bejaku baru Abdul Rahman madahka, entara chara ti udah dipejalaika Opis Menteri Industri Barang Pemakai, Komoditi enggau Pemansang Kandang Menua Sarawak (M-FICORD) kena nyapai juluk nya, keterubah, fokus ngagau pengawa ngeluarka produk agropemakai berega tinggi enggau beskala komersial.

Kedua, nambahka penyereta sektor peribit ari baruh model pengawa dagang Public-Private and Community Partnership (PPCP).

“Ketiga, nambahka pengawa pemansik, pemansang enggau inovasyen, ngena teknologi moden enggau digital ba sepemanjai rentayan nilai pemansut.

“Enggau, ngemansang sereta ngemanahka agi infrastruktur betanam betupi enggau ngerembaika kandang endur ngemansutka agrobarang pemakai.

“Dalam bajet 2023, Yang Amat Berhormat Premier Sarawak udah mantaika ungkup belanja sepenyampau RM509 juta ungkup opis menteri aku kena ngaga mayuh bengkah projek betanam betupi taun baru,” ku iya.

Nambah nya, iya madahka M-FICORD udah ngaga beberapa inisiatif besai kenyau ari taun 2017 nyentuk diatu.

Entara  inisiatif ke dipejalaika nyengkaum pemansang Agropark Sungai Baji; pemansang CPPC di Tarat, Layar, Limbang enggau Lawas; Pemansang Pasar Samarahan; pemansang tujuh (&) TKPM di Kibuloh, Rampangi, Semenggok, Penipah, Pejiru, Kubong enggau Sg. Ma’aw, enggau mayuh agi inisitif ke bukai, ti benung dalam mayuh renggat dipejalaika.

Kelimpah ari nya, Dr. Abdul Rahman madahka perintah nengah Opis Betanam Betupi Sarawak udah bejalika mayuh bengkah program enggau projek baka pemansang industri buah enggau sayur, tanaman kontan enggau lada ba sitak DUN Meluan.

Tebal agi industri aktiviti betanam betupi agi dipejalaika ngena skala mit, ku iya.

“Kena ngerembaika industry betanam betupi, opis menteri aku deka ngelala bagi sektor peribit ke bisi potensial kena bejalaika pemansang industry agrobarang pemakai nengah model pengawa dagang Public-Private and Community Partnership (PPCP).

“Entara utai tanam agrobarang pemakai ti bisi potensial dikemansangk ab sitak DUN Meluan ngena chara komersial enggau skala besai baka rian, nanas enggau pisang,” ku iya lebuh nyaut tanya tambah ari Rolland, kemari.

Advertisement