Ketegal ti keterubah lalu tu ulih meri empas ngagai penyampau pansut ngundi
"Laban ba umur 18 taun, taja bisi madah sida iya udah tuai runding, tuai runding ari sukut bukai, tang ari sukut politik agi bedau mayuh ke dikuasa.
Profesor Datuk Mohd Fadzil Abdul Rahman
Penganalisis Politik
KUCHING: Pengundi biak 18 taun dipelaba nyadi raban pemandu mayuh nurun ngundi sehari tu, ti lalu deka meri empas ngagai penyampau peratus pansut ngundi ba Pengawa Bepilih Besai Ke-15 (PRU15), ku Penganalisis Politik Profesor Datuk Mohd Fadzil Abdul Rahman.
Peratus pansut ngundi ti tinggi ku iya, iya nya laban pengagit ati sida deka ngundi keterubah iya enggau dalam timpuh ti sama, sama bela deka nempa sejarah.
Taja pia ku iya bepelasarka nama ti diperati, randau enggau apai indai, raban tu enda tentu nemu ngenukuka bagi chalun tauka parti ke deka diundi laban enda tentu teleba tauka meretika tiap parti ke belaban.
"Engka bisi ke enda setuju enggau penemu aku, tang aku ngasaika apai indai agi bejalaika tanggungpengawa ba anak nentuka bagi parti ke dipilih.
"Laban ba umur 18 taun, taja bisi madah sida iya udah tuai runding, tuai runding ari sukut bukai, tang ari sukut politik agi bedau mayuh ke dikuasa.
"Ambika chunto, nyema bisi parti ke enda tentu tebilang tang bisi chalun ti manah, sida enda nemu beratika pekara nya enggau semina meda ari sukut parti semua nya," ku iya ti mega Penolong Naib Canselor (Kepimpinan dan Pembangunan) Universiti Malaysia Sarawak (UNIMAS).
Mohd Fadzil madah, lebuh nyebut parti, ti selalu disebut mulut sida iya nya Barisan Nasional (BN), Pakatan Harapan (PH), parti ke udah lama.
Ba Sarawak ku iya, pengundi 18 taun tu udah nemu Gabungan Parti Sarawak (GPS) nganti BN, ditambah enggau rikod nyulut GPS ba Pengawa Bepilih Negeri ujung taun nyin kemari.
"Undi 18 ba aku bisi dua ti ulih dikemerat, keterubah sida tu deka mantu peratus ngundi ti nganti raban orang tuai ke nadai agi ati deka ngundi.
"Ambika chunto di Semenanjung, sida (raban orang tuai) engka bisi ti nadai ati ngundi laban politik ke enda tegap, kelimpah ari kiruh berundingka pekara bukai baka penanggul ampuh bah enggau penanggul bukai ti deka diperunding," ku iya.
Bepelasarka gaya tu, iya madahka, peratus pansut ngundi ba PRU15 engka enda setipak PRU14 iya nya maya nya pengundi sanggup pulai ari jauh ngaga ubah dalam perintah ti merintah ketegal mayuh isu sereta 'skandal' dalam perintah.
Tang pengudah 22 bulan perintah baru merintah, nyadi isu bukai iya nya perintah ti dipilih sida tumbang sereta betukar tiga Menteri Besai dalam siti penggal ti ngujungka tu ti ngasaka ati.
"Nya alai, tu entara isu ti ngasuh rayat ti beumur nyadi leju pansut ngundi, tang diselamatka ke sekali tu ngana pengundi 18 taun.
"Enti kitai ngagai pansik, kitai mansutka Undi 18 ba PRU15, nya peratus kebendar pansut ngundi PRU15 kena dibandingka enggau PRU14," ku iya.
Ari penemu diri, Mohd Fadzil bepenemu Undi 18 patut nya enda dipejalaika diatu laban digaga kelalu berumban sereta nadai pengawa nyikap diri tumu ngajar raban 18 taun tu.
Ku iya, endang betul menua bukai udah bejalaika Undi 18 tang ba iya, lebih manah sida diberi ruang enggau timpuh ke chukup ngelala dunya politik suba.
"Kitai nyukung Undi18 tang patut bisi langgur enggau pengawa nyikap diri ti silik kena ngajar, aku meri penemu ari umur 15 taun udah dipadah enggau silik pasal pemesai guna ngatur pengawa bepilih.
"Ari nya bisi tiga taun sida nyikap diri laban taja kaban politik, raban pakar, pemansik politik ,adah pengundi 18 udah tuai runding, pintar milih tang majoriti bedau nemu nama ke deka disukung, kelimpah ari ngulihka penemu apai indai.
"Aku nemu laban aku nyaga nembiak enggau tu enda ngayanka pilih ke bendar sida nyadi pengundi ti bisi penemu ke diri empu enggau pengelebih iya nya ngagai parti ke udah bisi nama.
"Nyadi pengelebih diatu ngagai parti ke udah bisi nama enggau pemanah rikod," ku iya.