Projek ngaga menara telekomunikasyen ngena ungkus belanja diri empu terus dipejalai dikena mutarka isu bekaul pengelubah servis internet
“Nya alai, perintah Sarawak nguna ungkup belanja diri empu kena masang kereban telekomunikasyen tu awakka peranak ba kandang menua pesisir nyengkaum di Sadong Jaya, Samarahan, Sebuyau, Simunjan sereta Gedong bisi penyambung internet ke lebih manah, lebih deras enggau mungkur semua jemah ila,”Datuk Julaihi Narawi
Menteri Utiliti enggau Telekomunikasyen
Dikarang Rengenyan Labang
KUCHING: Menteri Utiliti enggau Telekomunikasyen Datuk Julaihi Narawi madah kena nentuka kandang menua pesisir kena bungkur penyambung internet ti manah sereta deras, perintah Sarawak nguna chara iya nya ngaga menara telekomunikasyen lalu terus disikap ngena kereban tauka perengka telekomunikasyen.
Iya madahka, nya siti chara dikena betapi enggau pengelubah penyedia servis telekomunikasyen datai ke menua pesisir.
Nitih ku iya chara nya deka dipejalaika ba fasa 2 tagit nyendiaka menara telekomunikasyen di negeri tu.
“Bisi 300 agi menara fasa 2 ari 600 menara telekomunikasyen ti ditagit perintah Sarawak udah berengkah digaga diatu, sereta ke sekali tu kitai nguna chara iya nya lebuh menara tembu digaga kitai deka terus masang kereban telekomunikasyen.
“Kitai enggai agi nganti penyedia servis telekomunikasyen datai laban kitai nemu sida iya lubah.
“Nya alai, perintah Sarawak nguna ungkup belanja diri empu kena masang kereban telekomunikasyen tu awakka peranak ba kandang menua pesisir nyengkaum di Sadong Jaya, Samarahan, Sebuyau, Simunjan sereta Gedong bisi penyambung internet ke lebih manah, lebih deras enggau mungkur semua jemah ila,” ku Julaihi seraya madah nya tagit ke dipejalaika perintah Sarawak.
Julaihi madahka pekara nya lebuh iya bejaku seraya bejadika Program Sarawakku Sayang renggat bagi menua Samarahan ke diatur ba Dataran Panggung Udara Sadong Jaya , di Sadong Jaya, kemari.
Dulu ari nya iya madahka entara polisi ke udah dipejalaika perintah Sarawak sehari tu iya nya Strategi Pemansang Pengudah COVID-19 (PCDS) 2030, iya nya nagit Sarawak enggau rayat deka ngembuan penatai pemisi ti tinggi lebuh manggai taun 2030.
Sereta kena nyapai nya, enam sektor udah dikelala ke ulih dikemansang kena ngemansang sereta mai Sarawak nuju ngagai penatai pemisi tinggi lebuh manggai taun 2030, ku iya.
Lalu ku iya, udah dikelala tujuh enabler tauka chara dikena bejalaika enam sektor ke udah dikelala kena mai ubah enggau transformasyen serata Sarawak lebuh manggai 2030.
“Siti ari chara deka mai ubah tu iya nya nengah digital ekonomi, sereta digital ekonomi tu patut bisi transformasyen ari segi kereban jalur lebar (broadband) tauka kereban telekomunikasyen.
“Perintah Sarawak kebendar nagit 7,000 menara kena nentuka Sarawak ulih dibungkur jalur lebar ti deras enggau mungkur semua pekara lebuh manggai 2030. Tu juluk kitai 7,000 menara mesti disikap ngena kereban telekomunikasyen.
“Nyentuk diatu bisi 3,471 menara udah tembu digaga, enggau ari penyampau 3,471 tu bisi 300 menara ti digaga ejensi perintah Sarawak iya nya Sarawak Multimedia Agency. Sereta enggau 300 menara ke udah tembu tu di menua pesisir lalu dikearapka sida penyedia servis telekomunikasyen ngena menara tu,” ku iya.
Bejaku baru iya madahka, taja pia penyedia servis telekomunikasyen bisi lubah mimit datai sereta ngena menara ke udah tembu nya.
Berindik ari nya perintah Sarawak ngambi pengawa masang kereban telekomunikasyen, sereta nya alai 31 ari 3,471 menara nya tadi udah digaga enggau disikap kereban telekomunikasyen.
“Tagit kitai iya nya 124 ari 300 fasa keterubah menara tu deka ulih tembu dipasang ngena kereban telekomunikasyen lebuh datai ba ujung taun tu. Tu pekara ke benung digaga, enggau udah nya deka disambung ba taun baru,” ku iya.