KUCHING: Sapit Premier Sarawak Datuk Amar Douglas Uggah Embas kemari nyakal penemu chalun Bebas Betong, Hasbie Satar ti madahka iya (Hasbie) deka nyadi pengari rayat ti pemadu manah laban iya bisi peneleba nyadi sekretari politik menteri perintah besai sebedau tu.
Hasbie Satar kebendar iya bepanggai ba peneleba iya ari taun 2008 nyentuk 2010 enggau semua kaul rasmi ke digaga iya kena ngulihka pengundi ditu,ku Uggah.
Ku Uggah,chalun Gabungan Parti Sarawak (GPS) di Parlimen Betong Dr Richard Rapu megakala gawa nyadi sekretari politik iya kenyau ari taun 2008, iya nya maya iya (Uggah) nyadi sapit menteri ke udah nya nyadi menteri penuh ba perintah besai.
“Dalam taun 2016, iya nitihka aku lebuhka gawa baru di negeri tu lalu iya nyadi sekretari politik.
“Ari segi pematut, chalun kitai tu endang patut lalu iya mega siku lutur veterinari ke telatih ari universiti menua tu.
“Tang pekara ti ngasuh Dr Richard nyadi pilih ke pemadu manah, laban iya ngarika perintah GPS (Gabungan Parti Sarawak), perintah ti pemadu stabil sereta kering,” ku iya lebuh betemu enggau bala ketuai pampang mit enggau kaban ari semilan pampang mit PBB ba DUN Bukit Saban di Penom engagu Nanga Gayau di Spaoh,kemari.
Tambah Uggah, Dr Richard bisi platform ti manah sereta harmoni ari majoriti rayat Sarawak.
Kelimpah ari nya ku iya, GPS parti ti pemadu siru ngintu Sarawak, lalu enti iya tegap, semua orang deka bulih pemaik laban ulih mai pemansang enggau pengelantang ti mayuh agi ngagai semua.
“Undi ungkup Dr Richard endang undi ungkup GPS.Undi tu mega deka mayung pengelebih enggau hak Sarawak di Dewan Rakyat.
“Nya siti undi kena mulaika mayuh agi hak Sarawak ti lenyau ari baruh Sempekat Malaysia 1963 (MA63)," ku iya.
Ku Uggah, endang beguna amat GPS bisi ni naka iya pemayuh pengari di Dewan Rakyat ambika sida ulih nyukung polisi ti enda besiping ti meri pemaik ngagai negeri tu.
“Tang chalun bebas enggai Parti Keadilan Rakyat (PKR) ditu ngenggaika kuasa kitai (GPS).
"Sida enda bebendar lalu semina deka megai Betong ungkup juluk ati sida empu aja," ku Uggah.
Berebak enggau nya, iya meri langgur penemu ambika tim pampang mit nya ngepunka kimpin rengat ketiga ti mega kepenudi nyentuk ke sebedau tengah malam kena malam Hari Lima.
"Kaul pengundi biak enggau pengundi baru uambika sida ngundi.Umbuk sida nyukung chalun kitai.
“ tang bejejimat enggau sekeda orang ti nguji deka ngachau pengawa kitai," ku iya.
Berebak enggau nya, Uggah mega bisi dipadahka berita manah ke alai bisi sekeda kaban parti penyakal ba kandang menua Rimbas diatu deka nyukung GPS.
Dr Richard lebuh ke bejaku meri terima kasih ngagaiUggah, ex- Kaban Parlimen Betong Datuk Robert Lawson Chuat, semua orang ke datai enggau jurukimpin GPS menua dia laban udah mantu iya.
"Kitai bisi tim pemenang ti kering sereta bejakuka pasal penyerakup ti mega nyadi batang tuju tanggam kaul dalam GPS,” ku iya.