Jalai besai begembar ti nyambung Bau enggau Kuching tu ulih nentuka pemansang nyadi palan ti dilawa temuai
“Jalai tu (jalai lama Kuching ke Bau) taja enda jauh, lebih RM100 juta udah dikemendarka aku (perintah negeri). Tinda nya (projek tu) taun baru, bulan Empat (April).
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING: Jalai lama Kuching ke Bau deka dikemanah sereta dikemesaika nyadi jalai besai begembar, ti diadang ulih nyaup ngemansangka entara Bau enggau Kuching.
Premier Sarawak, Datuk Patinggi Tan Sri Abang Johari Tun Openg madahka perintah negeri deka chakah ngaga pemansang infrastruktur nyengkaum jalai lama Kuching ke Bau deka digaga nyadi jalai besai begembar.
Iya madahka projek nya dilanggur deka begunaka belanja lebih ari RM100 juta.
“Jalai tu (jalai lama Kuching ke Bau) taja enda jauh, lebih RM100 juta udah dikemendarka aku (perintah negeri). Tinda nya (projek tu) taun baru, bulan Empat (April).
“Anang irau (ADUN Serembu) Miro, jalai tu deka digaga sereta tu ulih ngemansangka entara Bau enggau Kuching,” ku iya.
Abang Johari madahka pekara nya lebuh bejaku ba Program Sarawakku Sayang ke diatur ba Pekan Warisan Siniawan di Siniawan, Bau ditu, kemari.
Dulu ari nya ADUN Serembu Miro Simoh dalam jaku pengelalu madahka peranak ba kandang menua nya minta jalai lama Bau ke Kuching nya dikemanahka agi kena ngeranchak tauka ngenyakahka agi aktiviti enggau kena nyaga pengelikun penguna jalai raya.
Abang Johari nambah nya madah diri deka meda kandang menua Bau ke Lundu sereta Sematan dikemansang nyadi hab dagang temuai setipak enggau ti kena bungkur sereta diaku nyadi Sarawak Delta Geopark.
Iya arap bendar pekara nya deka nyadi pematak temuai ke menua nya.
“Ungkup Siniawan, Bau ke Lundu kitai udah bisi langgur besai. Ari sukut infrastruktur dagang temuai, nama ke patut iya nya penyerakup kitai kena bejalaika projek ke udah dikemendarka tadi nyengkaum jalai tadi (ngemanahka agi jalai lama Kuching ke Bau).
Kelimpah ari nya, Miro dalam jaku pengelalu iya mega madahka Pelilih Menua Bau begunaka ketuai raban bansa iya nya penghulu, ti abis nadai ditambah enam iku agi penghulu.
Nambah nya, berindik ari dalam DUN Serembu semina bisi sebuah sekula sekondari iya nya SMK Paku ke udah ngeluai ari kapasiti iya nya bisi 1,800 iku nembiak sereta sekula dalam dua sesi, nya alai ku Miro, raban bansa ba sitak tu mega minta ditambah sekula sekondari, kelimpah ari patut ditambahka klinik pengerai.
Sama bisi datai ba pengemari tu kemari, Menteri Pelajar, Inovasyen enggau Pemansang Pengelandik ti mega ADUN Tarat Datuk Roland Sagah, Sapit Menteri Perengka Pengangkut ti mega ADUN Mambong Datuk Dr Jerip Susil, Sapit Menteri Perengka Pengangkut ti mega ADUN Tasik Biru Datuk Henry Harry Jinep, enggau chalun GPS Puncak Borneo Datuk Willie Mongin sereta sida ke bukai.