Anda di sini

GPS mesti menang ba 31 kerusi parlimen

Advertisement

Ambika GPS mega mesti kering laban nengah gempung tu ulih nentuka Malaysia jemah ila, ku Abang Johari

Abang Johari begambar enggau (ari kiba) Henry, Dr. Jerip (ari kanan), chalun GPS Puncak Borneo Datuk Willie Mongin, Sagah enggau Miro ba muralPasar Warisan Siniawan, di Bau, kemari. -Gambar Muhammad Rais Sanusi
Abang Johari begambar enggau (ari kiba) Henry, Dr. Jerip (ari kanan), chalun GPS Puncak Borneo Datuk Willie Mongin, Sagah enggau Miro ba muralPasar Warisan Siniawan, di Bau, kemari. -Gambar Muhammad Rais Sanusi

“Nya kebuah kitai engkah chalun bediri minta pilih ba semua 31 sitak, lalu kitai mesti menang ba semua 31 sitak. Enti kitai kering kitai ulih negika Sarawak”

Datuk Patinggi Tan Sri Abang Johari Tun Openg
Premier Sarawak 

Dikarang Rengenyan Labang

KUCHING: Gabungan Parti Sarawak (GPS) mesti menang ba semua 31 sitak parlimen maya Pengawa Bepilih Besai Ke-15 (PRU15) kena nentuka ulih berunding, negika hak Sarawak enggau nentuka Malaysia jemah ila.

Premier Sarawak,Datuk Patinggi Tan Sri Abang Johari Tun Openg madahka GPS mega mesti kering tauka tegap laban nengah gempung tu ulih nentuka Malaysia jemah ila.

Ari 222 sitak parlimen di Malaysia, Sarawak semina bisi 31 sitak lalu endang enda ulih numbuhka perintah besai, ku iya.

“Nya alai, sapa ke deka bekerejasama enggau Sarawak mesti nemu nama ke deka digaga ungkup Sarawak.

“Nya kebuah kitai engkah chalun bediri minta pilih ba semua 31 sitak, lalu kitai mesti menang ba semua 31 sitak. Enti kitai kering kitai ulih negika Sarawak.
“Bekaul enggau program Sarawakku Sayang, kitai sayauka Sarawak nya alai kitai mesti ngetanka hak kitai. Aku enda bebatak asur (ba pekara tu),” ku iya.

Abang Johari madahka pekara nya lebuh bejaku maya Program Sarawakku Sayang  ke diatur ba Pasar Warisan Siniawan di Bau, kemari.

“Diatu semua madah deka ‘besulu' enggau GPS. Parti tu deka enggau GPS, parti nya dekaka GPS, (GPS) baka ‘indu bajik’,” ku iya.

Chairman GPS nya madah, PRU15 tu keterubah iya GPS belaban ngena ‘kuda-kuda’ diri empu, sereta enti suba surat chiri nyadi chalun disain sida Barisan Nasional (BN) tang diatu surat chiri ari GPS.

Nya alai ku iya Sarawak mesti belaban ketegal semengatkitai sayauka Sarawak, laban agi mayuh pemansang kitai (deka dipejalaika).

“Lebuh kitai kering kitai ulih berunding, nya kebuah kitai mesti menang besai. Aku dekaka semua Sarawak tu menang besai. Enti kitai berunding enggau Kuala Lumpur, penemu kitai kering.

“Kitai udah kediri, kitai nadai kaul enggau sida din (Kuala Lumpur), sida iya ti bepanggai ba kitai. Bepanggai ba orang Bidayuh, laban Bidayuh bisi tiga sitak parlimen,” ku iya seraya ngelalau anang ngasuh pisang bebuah dua kali.

Bejaku baru, lebuh ngenang bekaul enggau peminta nyadika Sempekat Malaysia 1963 (MA63) sebagi ari konstitusyen, Abang Johari madahka maya Tun Mahathir Mohamad nyadi Menteri Besai, iya semina deka ngubah siti aja Pekara 1 (2) Malaysia iya nya nyengkaum Tanah Melayu, Sabah enggau Sarawak.

Abang Johari madahka GPS enda nerima sereta enda nyukung penemu Tun Mahathir ba senentang pekara ke deka diubah nya. ti disemaka baka ‘semadi aja', laban pun sempekat konstitusyen ke patut diubah, iya nya Pekara 160 ari baruh 'interpretation'.

Nama ke dikedeka kitai ba ubah iya nya MA63 nyengkaum IGC, lalu maya Datuk Seri Wan Junaidi Tuanku Jaafar nyadi ba Opis Menteri Besai (Parlimen enggau Undang-Undang), pekara nya dibai ke Dewan Rakyat sereta udah dikemendarka, ku iya.

“Nya alai hak kitai (MA63) lalu disengkaum dalam konstitusyen. Kitai udah mujur sentang tu tang kitai agi bisi ke silik agi dalam IGC enggau MA63, iya nya siti ari nya Pekara 112 D enggau C.

“Kedua, kitai dekaka Opis Kereja Raya (JKR) diaku nyadi opis teknikal ti bejalaika projek perintah besai di Sarawak, nambahka nya kitai dekaka Opis Bekal Ai Menua Pesisir (JBALB) enggau Opis Parit enggau Entali Ai (DID) sama baka nya.

“Sereta kitai mega deka ke Tuai Megai Menua (TYT) kitai bisi hak nentu sereta nyiri pesuruhjaya kehakiman (judicial commissioner). Suba ari baruh konstitusyen, sapa chalun nyadi akim mesti dipejuraika dulu lalu Sarawak mesti bisi hak, pekara tu deka dikeluarka (sida), enda tau dikeluar nya hak kitai (Sarawak).

“Nya kebuah kitai dekaka pengari rayat kitai mayuh ba Parlimen kena neruska pengeran kitai. Nadai orang bukai ulih ngibun Sarawak kelimpah ari orang Sarawak empu,” ku iya.

Sama bisi ngulu pengemari tu kemari, Menteri Pelajar, Inovasyen enggau Pemansang Pengelandik ke mega ADUN Tarat Datuk Roland Sagah, Sapit Menteri Perengka Pengangkut ti mega ADUN Mambong Datuk Dr Jerip Susil, Sapit Menteri Perengka Pengangkut ti mega ADUN Tasik Biru Datuk Henry Harry Jinep enggau ADUN Serembu Miro Simoh sereta sida ke bukai.
 

Advertisement