Berindik ari Pelilih Mit Menua Siburan diangkat nyadi Pelilih Menua Siburan kena13 Feb 2019, digazet kena 31 Mac 2022
Dikarang Rengenyan Labang
KUCHING: Perintah Sarawak deka numbuhka Opis Kaunsil Pelilih Menua Siburan, kena meri pengelantang enggau penguntung ngagai rayat ba kandang menua tu.
Premier Sarawak,Datuk Patinggi Tan Sri Abang Johari Tun Openg madah, nya berindik ari Pelilih Mit Menua Siburan udah diangkat nyadi Pelilih Menua Siburan.
Enti udah diangkat nyadi pelilih menua ku iya, infrastuktur pelilih menua mega deka dikemanahka agi nyengkaum bala pemesai perintah ke deka nyadi penyambung entara perintah enggau rayat.
“(Laban udah diangkat nyadi Pelilih Menua) Siburan sehari tu udah bisi D.O. Enti suba maya deka betemu enggau D.O ke Serian, tang sehari tu semina betemu di Siburan laban Siburan udah bisi D.O.
“Lebuh diangkat (nyadi Pelilih Menua Siburan) udah tentu opis iya mega deka dikemansangka,lalu ejensi perintah bukai deka diengkah ba endur tu.
“Reti nya ngagai Datuk Dr. Jerip Susil (ADUN Mambong), kitai deka ngaga Kompleks Opis Perintah Siburan. Kami udah ngaga perambu ba taun 2023 deka meri ungkup belanja khas dikena ngemanahka agi Siburan ari segi Kompleks (Opis Perintah Siburan), lalu ke bulih penguntung ari tu iya nya rayat kitai di Siburan,” ku iya.
Abang Johari mantaika pekara nya lebuh bejadi Kompleks Lumba enggau Main SJK Chung Hua Siburan, di Siburan, kemari.
Berebak enggau tu, iya mega madahka perintah negeri chukup beratka pekara pelajar di negeri tu nengah chara numbuhka Opis Menteri Pelajar renggat negeri ti bebida ari Opis Menteri Pelajar di Semenanjung.
Di Kuala Lumpur iya nya Opis Menteri Pelajar tang di Sarawak Opis Menteri Pelajar, Inovasyen enggau Pemansang Pengelandik ti ngayanka enggi negeri tu mungkur semua pekara, ku iya.
“Polisi pelajar kitai bebida mimit enggau Kuala Lumpur, laban kitai deka meda potensial pengelandik anak kitai kelebih agi anak Sarawak, ke ulih diberi enggau penemu ti setipak enggau pemansang dunya kemaya hari tu.
“Nya kebuah kitai mantu sekula Chung Hua iya nya meri ungkup belanja RM10 juta tiap taun, kitai mega mantu sekula misyen baka nengah UNIFOR, laban sekula tu bisi ari baruh gerija Methodist, Anglikan tauka Roman Katolik. Sekula primari China tauka middle school diberi ungkup belanja RM12 juta ninting taun.
“Kebuah kitai meri bantu ngagai semua sekula (di negeri tu) laban kitai deka meri penemu enggau pemandai ngagai anak kitai, awakka sida tu ulih meri pulai baru ngagai raban bansa ila,” ku iya.
Kelimpah ari nya Dr. Jerip Susil ti mega Sapit Menteri Perengka Pengangkut dalam jaku pengelalu iya madah, Pelilih Menua Mit Siburan diangkatka nyadi Pelilih Menua Siburan kena 13 Februari 2019 ba Gelanggang Bola Keranjang Siburan sereta rasmi digazet lalu berengkah diteritka kena 31 Mac 2022.
Berebak enggau tu Dr. Jerip mega meri terima kasih ngagai perintah Sarawak ke meri ungkup belanja sepenyampau RM2.1 juta ti diberi nengah Lembaga Sekolah Jenis Kebangsaan Chung Hua Siburan kena 3 September 2020 kena ngaga kereban lumba enggau main baka 'grandstand' enggau trek lumba.
“Pengawa ngaga Kompleks Lumba enggau Main tu beguna amat awakka bisi dikena nembiak ba SJK Chung Hua Siburan sereta mega dibuka ngagai mensia mayuh.
“Projek ti mungkur grandstand, trek lumba enggau infrastruktur lumba enggau main ti amat beguna ke pelajar pengerai enggau aktiviti lumba enggau main, ti meri penguntung ari segi pengerai enggau muka peluang ngiga nembiak ti landik ba lumba enggau main,” ku iya.
Berebak enggau tu, Dr. Jerip mega minta perintah negeri nambahka pangku pengawa baru ketuai raban bansa ba Pelilih Menua Siburan nyengkaum Pemancha Bidayuh (1), Pemanca China (1), lima Penghulu (Bidayuh, Melayu enggau China), enggau mega Temenggong Melayu (ungkup Nagi Menua Serian).
Kelimpah ari nya, iya mega minta Opis Perintah Sarawak ungkup Pelilih Menua Siburan nyengkaum nyendiaka taba alai ngempuruka mayuh bengkah ejensi perintah, kuarters baru pengereja pengawa perintah enggau rumah sembiang (Masjid, Gerija, Tokong enggau ke bukai.
Sama bisi ngulu pengerami tu kemari, chalun Gabungan Parti Sarawak ba Parlimen Puncak Borneo Datuk Willie Mongin enggau sida ke bukai.