KMKK patut ngembuan integriti, rurus sereta terit lebuh bejalaika pengawa mutarka kes Kort Bumiputera Sarawak
"Fokus kitai ba program ke sekali tu iya nya bekaul enggau tanggungpengawa enggau kereja ketuai raban bansa enggau tuai rumah lebuh bejalaika tanggungpengawa undang – undang ti dikearapka perintah negeri”
Datuk John Sikie Tayai
Menteri ba Opis Premier Sarawak
SIBU: Ketuai raban bansa enggau tuai rumah (KMKK) patut ngembuan integriti, rurus ati sereta terit lebuh bejalaika tanggungpengawa sida mutarka kes Kort Bumiputera Sarawak.
Menteri ba Opis Premier Sarawak Datuk John Sikie Tayai madah,KMKK nyadi tulang belakang perintah sereta nentuka agenda pemansang perintah dikenataika ngagai rayat ba renggat nembiak redak.
"Fokus kitai ba program ke sekali tu iya nya bekaul enggau tanggungpengawa enggau kereja ketuai raban bansa enggau tuai rumah lebuh bejalaika tanggungpengawa undang – undang ti dikearapka perintah negeri.
"Program dua hari tu diatur khas ungkup ketuai raban bansa enggau tuai rumah ti baru dichiri enggau tuju ngiri penemu enggau chara mutarka kes kort ke betul nitihka chara tauka atur ti udah ditetapka," ku iya.
Sikie bejaku munyi nya lebuh bejadi Seminar Mutarka Kes Kort Bumiputera Sarawak ungkup Ketuai Raban Bansa enggau Tuai Rumah Pelilih Menua Pakan dan Julau di sebuah hotel ditu, kemari.
Kaban Kunsil Negeri Kakus nya madah, endang patut amat sida ti dikearapka bejalaika pengawa kort tu diiri penemu, pengelandik enggau semua penemu ti diguna nya belama.
"Sida deka diri penemu nengah licha ari pengelicha Kort Bumiputera empu sentang chara ke betul, teratur sereta bepelasarka ordinan ti meri kuasa ngagai sesiku tuai rumah tauka ketuai raban bansa mutarka kes kort ba renggat sida.
"Nya alai, tuju ngatur program ke baka tu endang kena ngiri penemu, nambahka penemu enggau kompetensi bala pesereta mutarka kes kort, endang ba maya ti patut," ku iya.
Bi si 180 iku bala KMKK ari Pelilih Menua Pakan enggau Julau, Bagi Menua Sarikei bisi engagu ba seminar dua hari berunggu nya.
Sama bisi maya nya, Ketuai Pengerejista Kort Bumiputera Sarawak Datu Michael Dawi Alli enggau Temenggung Datuk Janggu Banyang.