KUCHING: Kereban arkib ti amat nyadi kuasa besai ti diterima ba kort antarabansa lalu nyadi bukti kes kena ngetanka kuasa tetinggi enggau wilayah ba garis entara menua ti mungkur tasik, darat enggau langit.
Premier Sarawak, Datuk Patinggi Tan Sri Abang Johari Tun Openg madah, peneleba Malaysia napi isu minta garis antara menua ngayanka pemesai guna kereban arkib nyadi bukti tegap kena nyukung pemutus sesebengkah kes.
Ambika chunto ku iya, kes minta Pulau Ligitan enggau Sipadan (2020) di menang Malaysia berindik ari rikod ke bisi ditemu ba institusyen akrib ti mandangka aktiviti enggau kuasa Malaysia ba pulau nya.
“Peneleba menua betapi enggau kes netapka garis antarabansa nyadi lalau ngagai Malaysia kelebih agi negeri Sarawak. Negeri kitai iya nya negeri pemadu besai di Malaysia ti bisi garis entara enggau dua buah menua.
“Nya alai, aku minta semua opis perintah negeri enggau besai awakka komited nyaga rikod ti ditumbuh enggau patut nyuaka rikod nya ti mendam rega ngagai Pustaka Negeri Sarawak Menua Malaysia Negeri Sarawak ungkup rikod perintah besai.
“Ba timpuh ti sama, pengeran deka ngiga tauka nyidi enggau ngulihka kereban arkib ari dalam enggau luar menua patut chakah agi dipejalaika. Inisiatif tu amat beguna kena ngerapitka takah penerang sejarah enggau pesaka asal menua,” ku iya.
Abang Johari madahka pekara nya dalam teks jaku iya ti dibacha Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah ngarika iya bejadi Begunan Arkib Negara Malaysia Negeri Sarawak ditu, kemari.
Abang Johari madahka rikod tui ditaruh enggau dijaga ba institusyen arkib ulih mantu ngelanggur enggau pintar pekara ke deka digaga jemah ila bepelasarka teladan enggau peneleba.
Nya alai ku iya, institusyen arkib patut ditanka lalu pemadu relevan nyadi penyaga dokumentasyen reta pesaka asal menua.
Nyema institusyen nya runtuh ku iya, kitai deka lenyau kereban arkib iya nya pengingat mensia enggau bukti tamadun bansa.
Sejarah bisi ngayanka sekeda insitusyen arkib udah rusak tauka punas, ambika chunto di Liberia, Rwanda enggau Iraq urung dalam taun 1990-an enggau 2000-an, kelimpah ari perang Rusia – Ukraine diatu mega udah mayuh ngerusak ukai semina kereban arkib tang mega bup, monumen enggau artifak sejarah, ku iya.
“Berindik ari nya, pengelenyau kereban arkib nya pekara ti chukup serius enggau ulih ngeruga pengetan reta menua ungkup rebak dudi,” ku iya.
Kelimpah ari nya Abang Johari mega ngarapka bisi kerejasama entara Arkib Menua Malaysia Negeri Sarawak enggau Pustaka Negeri Sarawak ba pengawa ngaduka rikod ulih ditegapka agi.
Ku iya, pengawa ngaduka rikod ulih ditegapka agi ngena chara inklusif nengah undang-undang, ngemunas konsultansi, audit, program latih, naruh enggau ngibun.
“Aku arap amat, kerejasama ti nadai betatak baka tu patut ulih ngangkatka kompetensi, modal mensia enggau nempa Subject Matter Expert (SME) ke guna dalam enggau luar menua.
“Ari tu, pengeran kitai ba pekara tu deka meri pengulih ngagai akauntabiliti enggau integriti ngaduka rikod ti bisi budaya ti tinggi rega,” ku iya.
Sama bisingulu pengerami tu kemari, Menteri Dagang Temuai, Seni enggau Budaya Datuk Seri Nancy Shukri, Sapit Menteri Energi enggau Ngetanka Rampa Menua Dr Hazland Abang Hipni, Ketuai Direktor Arkib Negara Malaysia Datuk Jaafar Sidek Abdul Rahman enggau bala pemesai ke bukai.