SERIAN: Penyandang kerusi P 199 Serian, Datuk Seri Richard Riot Jaem, taja pan udah beumur 71 taun sereta deka ngetanka kerusi nya ungkup penggal kelapan,madahka diri agi regas bejalaika pengawa nyadi pengari rayat.
Ku Riot,iya agi regas fizikal enggau mental sereta ngembuan pengeran ngangkatka Serian ngagai tikas ke tinggi agi.
“Aku agi regas fizikal enggau mental sereta agi keran mai pemansang ke manah agi ngagai parlimen Serian.
“Bisi orang bukai ti tuai agi ari aku agi regas gawa taja pan udah beumur 78 tauka 96 taun,” ku madah ngagai pengarang berita pengudah bejadi Raban Pengawa Bepilih Raban Indu GPS ba Dewan Sri Riot, di Kampung Piching, ensana.
Iya mega madahka diri arap amat ati ulih ngetanka kerusi Serian maya Pengawa Bepilih Ke- 15 tu.
Riot ke mega ex-Sapit Menteri Luar sereta ex-Menteri Pemansang Pengereja Pengawa, ke diatu nyadi Duta Khas Menteri Besai ti megai status Opis Menteri Asia Timur madah, agi mayuh pemansang deka dibai iya ke Serian.
Ku iya, taja pan Bagi Menua Serian baru ditumbuhka di Sarawak, tang Serian udah balat mansang.
Entara pemansang ti udah dibai iya ke Serian, iya nya numbuhka Institut Latihan Perindustrian ti 85 peratus udah tembu digaga.
Ku iya, palan deka meri latih sereta nempa pengereja pengawa ngembuan pengelandik gawa, lalu dipelabaka deka beoperasyen pun taun 2024.
Kelimpah ari nya, iya mega ngarapka Opis Imigresyen, Kastam enggau Kuarantin (ICQ) di Tebedu deka bisi sebuah kompleks baru kena nangkup guna betengahka garis entara menua ti majak nambah entara Sarawak enggau Kalimantan.
Riot madah, Tebedu Inland Port ti dilakka pia aja, patut dikemansangka.Enti palan nya dikemansangka enggau meruan, nya deka meri penguntung ngagai rayat Serian.
Iya mega madahka pematut numbuhka dua buah sekula baru, iya nya Sekula Primari (SK) Sri Sadong enggau Sekula Sekondari (SMK) Serian No.2 kena nangkup penyampau nembiak sekula ti majak mayuh di Serian.
Berebak enggau nya, Riot mega madahka diri arap amat ati enggau Greater Kuching Coordinated Development Agency (GKCDA) deka mai mayuh agi pemansang ngagai kandang menua bansa Bidayuh, berengkah ari Lundu nyentuk ke Serian.
Ku iya, tu mih kebuah aku agi keran mai pemansang sereta gawa ngagai rayat Serian kelimpah ari deka mai sada rayat Sarawak ke Parlimen, ku iya.