KAPIT: Opis Menteri Dagang Antarabansa, Industri, Terminal Industri enggau Pemansang Orang Dagang (MINTRED) udah diberi tanggungpengawa dalam bejalaika inisiatif digital Program Go Digital ti nyendiaka bantu geran maksimum RM10,000.
Menteri MINTRED Datuk Amar Awang Tengah ALi Hasan madah, naka diatu, 600 iku orang dagang udah bulih bantu enggau penyampau RM6 juta kenyau ari dipejalaika ba taun 2021.
Nitih ku iya, taun tu bisi 10 Dagang Mit enggau Tengan Pemesai (PKS) ari Kapit udah nerima geran kereban enggau guna digital.
Tu iya nya dikena neruska pengawa dalam nentuka orang dagang ti 'digital' kelebih agi orang dagang menua pesisir.
"Nengah program tu orang dagang deka diajar enggau dikemataka pengelama enam bulan dalam nentuka sida ulih nguna kereban digital enggau efektif," ku iya nerang.
Awang Tengah madah munyi tu nengah teks jaku iya ti dibacha Sapit Menteri Dagang Antarabansa, Industri enggau Beranakka Puku Sarawak Datuk Dr Malcolm Mussen Lamoh maya Pengerami Bejadi Program Jum Regista di Dewan Komuniti Kampung Muhibbah, Kapit, kemari.
Awang Tengah ti mega Sapit Premier Sarawak madah, nengah pakej nyungkak ekonomi, perintah besai udah nyendiaka mayuh macham skim dikena mantu PKS.
"Perintah Sarawak udah nyendiaka subsidi ungkup PKS di Sarawak ti udah dikemendarka ari baruh Skim 'Special Relief Fund' (SRF), Targeted Relief & Recovery Facility (TRRF) enggau PENJANA Tourism Fund (PTF)," ku iya.
NAka diatu, ku iya nambah, perengkaguna nya udah mantu urung 3,335 PKS enggau penyampau subsidi sepenyampau RM76.1 juta.
"Dikena mantu gerempung orang dagang mutarka pandemik COVID-19, opis menteri aku udah diberi pengawa nyadi ketuai bejalaika Business Empowerment and Recovery Fund (BizFund)," ku iya.
Nitih ku iya, BizFund iya nya bantu mata duit ungkup gerempung orang dagang Sarawak dikena ngatur program pemansang kapasiti enggau pemansang dagang ungkup kaban sida.
"Nyentuk diatu, opis menteri aku udah melanjaka RM9.3 juta dikena bejalaika 84 program; ti udah meri pemaik 3,350 raban B40, orang dagang mikro enggau PKS," ku iya.
Ba pengerami tu, bisi 41 iku udah nerima replika chek bantu orang dagang- REGISTA Kapit.
Sama bisi iya nya Sapit Menteri di Opis Premier Sarawak (Undang-Undang enggau Adat Bumiputera) enggau Kaban Kunsil Nengeri (ADUN) Bukit Goram Jefferson Jamit Unyat.