Anda di sini

GPS dipelabaka deka megai tanggungpengawa berat nentuka perintah baru pengudah PRU15

Advertisement
 

KUCHING: Gabungan Parti Sarawak (GPS) dipelabaka deka megai tenggungpengawa ti berat sekali agi dalam nentuka perintah pengudah Pengawa Bepilih Besai Ke-15 (PRU15) tu.

Penganalisis Politik Dato Peter Minos madah, pengudah seminggu timpuh kimpin PRU15, pengerembai politik di Semenanjung Malaysia dipeda majak ngenyarutka runding sereta temera.

Ku iya, tusah deka meda gempung ni ti deka nempa perintah, sekalika Barisan Nasional (BN), Perikatan Nasional (PN) tauka Pakatan Harapan (PH).

“BN ti betuaika UMNO ngembuan penanggul dalam ti besai keterubah ti muai mayuh chalun ke manah lalu nama parti tu kurang manah laban ti ditemu ngembuan ketuai ari kluster kort.

“PH mega dipadahka gempung ti enda mujur pengudah semina 22 bulan megai perintah besai berindik ari penyarut politik ti diangkatka sida empu.

“Pia mega PN dipeda lenyau momentum lalu enda meri pengarap sereta pengeransing nagagai rayat di Semenanjung Malaysia,” ku iya nengah penerang media kemari.

Ku Minos nambah, iya melabaka ukai BN tauka PH tauka PN deka bulih minimum 112 ari 222 kerusi Parlimen.

“Pengudah hari ngundi kena 19 November, deka bisi baru belaban ungkup sebuah gempung deka ngulihka minimum 112 kerusi.

“Muakka Sabah, tusah deka bepanggai enggau nya lalu GPS deka sekali agi megai tanggungpengawa dalam nentuka pemutus,” ku Minos.

Nya alai, ku Minos, rayat Sarawak patut meri semua 31 kerusi ngagai GPS ungkup pemaik Sarawak jemah ila dalam PRU15 tu.

Advertisement