Tu ukai budaya di Sarawak lalu tu mega ulih mambarka penyerakup entara pupu raban bansa di nengeri tu ti endang udah bisi ari suba
“Nya alai, nengah pengeransing tu, anang kitai nitihka budaya orang bukai lalu enda bepolitik ti ngaul pekara raban bansa.”
Datuk Patinggi Tan Sri Abang Johari Tun Openg
Premier Sarawak
KUCHING: Semua renggat komuniti patut nyeliahka politik ti bekaul raban bansa tang sama dalam nyaga pemanah penyerakup bansa, di nengeri tu.
Premier Sarawak Datuk Patinggi Tan Sri Abang Johari Tun Openg madah, tu ukai budaya di Sarawak lalu chara tu ulih mambarka penyerakup entara pupu raban bansa.
“Di sitak tu (Betong), iya nya ngemeranka konsep penyerakup pupu raban bansa entara komuniti Iban enggau mega Melayu.
“Nyema kitai pansik sejarah, terabai menua ke suba iya nya Rentap enggau Syarif Mansor sama bebendar ngelaban Brooke lalu seduai ngembuan kaul ti chukup rat.
“Nya alai, nengah pengeransing tu, anang kitai nitihka budaya orang bukai lalu enda bepolitik ti ngaul pekara raban bansa,” ku iya lebuh ti bejadi Semina Ngenegapka Institusyen Ngatur Pengawa Renggat Baruh Bagi Menua Betong, di Dewan Stephen Kalong Ningkan kilah ensana.
Sama bisi datai iya nya Sapit Premier Sarawak Datuk Amar Douglas Uggah Embas, Sekretari Perintah Nengeri Datuk Amar Mohamad Abu Bakar Marzuki sereta temuai ti dipebasa ke bukai.
Kelimpah ari nya, iya madahka ketuai komuniti patut megai tanggungpengawa ti berat dalam bekerejasama enggau perintah.
“Nya alai beguna ketuai renggat baruh dipebasa orang di kandang menua iya laban kitai bisi kaul ti manah.
“Ketuai di renggat baruh enggau perintah nengeri patut bekerejasama ari baruh siti perabung ungkup pemujur Sarawak jemah ila ti manah agi.
“Lebuh kitai (perintah) ngemansangka Sarawak enggau polisi digaga perintah nengeri, kitai bisi proses dalam ngatur pengawa ti ngaul ketuai iya nya temenggung, pemancha, ketuai bansa enggau tuai rumah,” ku iya nambah ti mega Menteri Pekara Wang enggau Ekonomi Baru.
Ku iya nerang agi, sida (ketuai) ti megai tanggungpengawa lalu diberi kuasa dalam nentuka penanggul enggau pengurang ti bisi di kandang menua sida ngambika ulih diputar.
Beserimbai enggau nya, Sapit Premier Saraak Doughlas Uggah dalam jaku pengelalu iya madahka seminar tu udah disereta 747 iku iya nya ti datai ari ketuai bansa, kunsilor enggau ketuai komuniti.
Ku iya, seminar tu iya nya dikena meri penerang bekaul enggau pengawa ketuai kelimpah ari madahka pengawa ti udah dipejalaika perintah naka ke diatu.
“Kelimpah ari nya, ketuai deka diapadahka bekaul enggau pengelandik dalam mutarka isu bekaul penusah ngenyit,” ku iya nerang agi.