Berindik ari bisi nyendiaka peluang gawa iya nya nengah mayuh macham projek ti dipejalaika perintah diatu
"Tu laban peyampau pemayuh peranak ti majak nambah ketegal penambah ba pengawa ngaga projek rumah kelimpah ari ngaga bangunan enggau institusyen ti strategik di Kota Samarahan,"
Datuk Patinggi Tan Sri Abang Johari Tun Openg
Premier Sarawak
KUCHING: Kota Samarahan deka nyadi penyungkak penumbuh ekonomi kelimpah ari nyendiaka peluang gawa nengah mayuh bengkah projek ke dipejalaika perintah diatu.
Premier Sarawak, Datuk Patinggi Tan Sri Abang Johari Tun Openg madahka , ketegal nya Kota Samarahan nyadi alai ke suah dilawa raban bansa ngujungka endur tu betapi enggau jalai alun ti sekut.
Nitih ku iya, pemansang ti jampat di Kota Samarahan entara kebuah kelalu balat sekut baka ti nyadi sehari tu.
"Ngaga projek lampu trafik nya sebengkah ari chara sementara kena ngurangka penanggul jalai alun ti sekut.
"Tu laban peyampau pemayuh peranak ti majak nambah ketegal penambah ba pengawa ngaga projek rumah kelimpah ari ngaga bangunan enggau institusyen ti strategik di Kota Samarahan," ku iya lebuh bejaku ba Pengerami Ngintu Genap Enam Taun Majlis Perbandaran Kota Samarahan (MPKS) ba Hotel Hilton ditu, malam ensanus.
Abang Johari bejaku baru madah, pengawa ngaga palan perubat pengerai di Kota Samarahan mega deka nambahka penyampau peranak ba endur nya.
Tu laban, ku iya peminta diatu begunaka raban saintis enggau pakar datai ke Kota Samarahan.
"Kandang menua Samarahan deka nerima mayuh pakar sereta kereja begaji tinggi ba kandang menua ke ngelinggi nya enggau sida deka meli rumah ke digaga kitai.
"Nya alai, kitai begunaka langgur penemu keba ngaga jalai ba kandang endur ke betapi enggau penyekut ti balat sepemanjai jalai besai.
"(Langgur) jalai tu (Kota Samarahan) deka ke kandang menua Tanjung Bako, lalu ke jematan baru di Sejingkat enggau terus ke kandang menua Petra Jaya," terang iya seraya madaha, perintah mega deka ngaga palan penyangkai kapal baru di Tanjung Bako ti deka disambung terus nengah jalai tebing tasik.
Ngenang silik, tu iya nya asil ari pemansang ti deka nyadi nyentuk ke Kota Samarahan dalam timpuh tujuh taun nyentuk 2030.
"Kitai ulih ngaga tu nengah langgur timpuh panjai ke dikemisi kitai di entara Kuching enggau Kota Samarahan," ku iya.
Sama bisi datai Menteri Dagang temuai, Industri Kreatif enggau Seni Pemerindang Dato Sri Abdul Karim Rahman Hamzah, Kaban Kunsil Negeri (ADUN) Simunjan, Awla Dris, Chairman MPKS Dato Peter Minos enggau bala pemesai ke bukai.