Anda di sini

Penatai pemisi Sarawak diatu lebih ari RM10 bilion

Advertisement

Asil ke mayuh diulih nya ti diterima perintah negeri deka dikena ngaga pemansang Sarawak ungkup jemah ila

Abang Johari (tengah) disambut enggau basa  peranak Kampung Long Tuma, Lawas kemari seraya dirasukka baju tradisional raban bansa Lun Bawang. 
Abang Johari (tengah) disambut enggau basa  peranak Kampung Long Tuma, Lawas kemari seraya dirasukka baju tradisional raban bansa Lun Bawang. 

“Suba asil kitai semina RM 4 ngagai RM5 bilion, sebedau aku nyadi Kepala Menteri enggau Premier, pemadu mayuh ke diulih iya nya RM6 bilion,diatu penatai pemisi Sarawak lebih ari RM10 bilion.”

Datuk Patinggi Tan Sri Abang Johari Tun Openg 
Premier Sarawak


LAWAS: Penyampu asil ti mayuh agi diulih Sarawak dipelaba deka dipadahka maya aum Kunsil Negeri (DUN) Sarawak ujung bulan tu, pia ku Premier Sarawak Datuk Patinggi Tan Sri Abang Johari Tun Openg.

Ku iya, Asil ke mayuh diulih nya ti diterima perintah negeri deka dikena ngaga pemansang Sarawak ungkup jemah ila.  

“Suba asil kitai semina RM 4 ngagai RM5 bilion, sebedau aku nyadi Kepala Menteri enggau Premier, pemadu mayuh ke diulih iya nya RM6 bilion,diatu penatai pemisi Sarawak lebih ari RM10 bilion. 

“Ujung bulan tu aku deka mantaika penatai pemisi kitai dalam DUN.

"Nya mega dua digit, ukai juta tang bilion dua digit,” ku iya lebuh ke bejaku bejadi Program Sarawakku Sayang di Kampung Long Tuma, Lawas, ditu kemari. 

Berebak enggau nya, iya mega madah deka  mantaika siti undang-undang baru iya nya 'Dana Kekayaan Berdaulat' Sarawak ba DUN ke sekali tu. 

“Penatai pemisi tu ditaruh kitai ke anak uchu kitai dudi ila.

"Nadai negeri bukai bisi Dana Kekayaan Berdaulat, semina Sarawak aja bisi Dana Kekayaan Berdaulat. 

“Saya berani ngaga tu laban aku nemu ekonomi kitai deka nyadi tegap,enti ekonomi kukuh, kitai ulih ngemansangka pengelandik anak kitai,” ku iya.

Kelimpah ari nya, Abang Johari madahka perintah deka ngulaika Limbang enggau Lawas nyadi siti ari sitak ti mansang baka sitak bukai di serata Sarawak. 

“Taja pan kita jauh (di utara Sarawak), tang kita ukai kediri.

"Kita mesti bisi dalam arus besai pemansang ke deka kami beri ngagai rayat. 

“Ketegal nya mih, NRDA (Agensi Pemansang Kandang Menua Wilayah Utara) ditumbuhka laban kami nemu kandang menua tu begunaka pemansang infrastruktur ke teatur ti deka meri penguntung ngagai rayat ditu. 

“Sitak tu begunaka duit turu ke mayuh laban ungkus minyak ke mayuh, nya kebuah kami numbuhka NRDA lalu kami meri ungkup belanja khas ngagai NRDA RM1.5 bilion dikena ngemansangka sitak tu nengah siti pelin besai nyengkaum pelajar, infrastruktur enggau servis pengerai,” ku iya. 

Sama bisi ngulu pengerami nya,Sapit Premier Sarawak Datuk Amar Awang Tengah Ali Hasan, Yang Dipertua Speaker DUN Sarawak Tan Sri Datuk Amar Mohamad Asfia Awang Nassar, Sapit Menteri Perengka Pengangkut Datuk Henry Sum Agong enggau Sapit Menteri ba Opis Premier Sarawak (Pengereja Pengawa Kasar, Imigresyen enggau Matau Projek) Datuk Gerawat Gala.

Advertisement