KUCHING: Ngemeranka prinsip demokrasi, tiga iku chalun ti kala ‘seperau’ iya nya Datuk Willie Mongin, Iana Akam enggau Diog Dios deka betemu sereta berebutka undi ba sitak Parlimen Puncak Borneo ba Pengawa Bepilih Besai Ke-15 (PRU15), 19 November tu.
Sebedau tu tiga chalun ke bediri minta pilih Parlimen Puncak Borneo tu, kala sama duduk dalam Parti Keadilan Rakyat (PKR), sepenemu deka besemekih enggau manah sereta ungkup rayat.
Datuk Willie Mongin, 47, ti ngarika Gabungan Parti Sarawak (GPS) lebuh dikerandauka raban pengarang berita madah dua chalun iya nya baka Diog enggau Iana ke belaban enggau iya ba Parlimen Puncak Borneo nya endang sama dibai sereta dalam PKR sebedau tu.
Taja pia Willie madahka ke sekali tu bepelasarka demokrasi iya ngarapka sida tiga ulih belaban ngena chara ti manah (sihat) setipak enggau menua ti ngemeranka demokrasi.
“Aku mai sida tu masuk PKR suba baka menyadi Diog enggau Iana. Tang kitai enda ulih ngenggaika iya nya tu prinsip demokrasi ke alai tiap individu tauka enda ngira sapa ke bisi ati deka bediri minta pilih sida bisi hak ari baruh bebas demokrasi.
“Aku mega arap semua penyukung tauka pengundi ulih meda pengelurus ati aku enggau mega penyulut kereja ke udah dibai ngagai Parlimen Puncak Borneo, ke ulih diperatika sida. Aku ulih meretika mayuh pekara ke bedau ulih digaga kitai 100 peratus , tang kitai deka terus bebendar ngaga nya.
“Ngagai sida tu (Iana enggau Diog) aku nerima semekih tu nyadi penguji demokrasi ti manah dalam menua kitai,” ku iya.
Dulu ari nya iya beterima kasih ngagai bala pemesai renggat tinggi GPS ke meri awak ngagai iya neruska pengawa ba Puncak Borneo enggau ngangkat sereta ngitauka tambai GPS.
Berebak enggau tu Willie enggau baruh ati minta ampun nyema maya agi ba sepiak (penyakal) bisi enda ngelantang ati enda ngira sapa.
“Aku minta ampun, sereta kitai patut beserakup enggau kena negika sereta nyaut peminta YAB Premier iya nya mai mayuh agi pemesai enggau pengari parlimen GPS ke Parlimen.
“Menang tu ukai ungkup Willie Mongin aja tang ungkup GPS mai penemu ti lebih besai ngagai awakka ulih ngangkatka peminta ba renggat perintah besai.
“Pemenang tu mega ungkup rayat Sarawak enggau nyema bisi 'sabotaj' nya ukai semina ngagai aku ke nyadi chalun tang mega ngagai GPS nya empu,” ku iya seraya beterima kasih ngagai pelobi ke sebedau tu ketegal ke udah madah diri deka nyukung iya ngarika GPS.
Sitak Parlimen Puncak Borneo, penyandang iya Willie ti menang ba sitak Parlimen tu maya PRU14 ngarika PKR sebedau diengkah ba Parti Pribumi Bersatu Malaysia (BERSATU) sereta masuk Parti Pesaka Bumiputera Bersatu (PBB), lalu ba PRU15 iya ngetanka sitak tu nyadi chalun GPS.
Nambah nya, Diog, 55, ari PKR ti nyadi chalun Pakatan Harapan madah sida tiga Willie enggau Iana kala segulai dalam parti sebedau tu deka belaban ngena lambang ke enda sama.
Diog ti nyadi Ex-pengajar enggau ex-pengelicha madahka pekara nya enda nyadika penanggul sereta ngembuan runding ti tuai dalam politik.
“Kebendar nya Willie Mongin enggau Iana Akam sebedau tu sama bakih dalam PKR, nya alai tadi asaika deka ketawa laban semua ari PKR belaban minta pilih tang ngena lambang diri empu.
“Ba aku tu ukai nyadi penanggul tang nyadi semekih politik ti manah, di luar kitai nyadi bakih tang dalam politik kitai ulih mereti iya nya maya kitai bepolitik reti iya politik kitai ungkup rayat, ukai ungkup diri empu,” ku iya ke nyadi Naib Chairman 2 PKR Sarawak.
Nitih ku Diog iya berengkah dalam politik tu kenyau ari taun 2016 ti berengkah bejalai nadai parti, udahnya ba taun 2018 Pakatan Harapan menang lalu numbuhka perintah, lalu ari nya iya enggau rasmi tama PKR.
Lalu ba PRU15, iya arap bendar PH mega ulih numbuhka perintah baru kelebih agi diatu Undi 18 udah berengkah dikena.
“Taja pan ari segi peneleba kami (chalun ba Parlimen Puncak Borneo) dalam politik aku ngasaika iya sama , tang nama ke dikearap sereta dikedeka ba Puncak Borneo iya nya ubah.
“Nya alai aku ngarapka pengundi kitai di Puncak Borneo tu ngambi peluang tu kena bejalaika tanggung pengawa kena 19 November ila sama nurun ngundi,” ku iya.
Kelimpah ari nya lebuh dikerandau Iana Akam, 47, ari Parti Sarawak Bersatu (PSB) madahka sida tiga chalun minta pilih ba Puncak Borneo ngembuan penegap tauka pengering ke diri empu.
Iya masuk politik iya nya nyereta Parti Keadilan Rakyat (PKR) ari taun 1999, lalu masuk Parti Sarawak Bersatu (PSB) pengudah Pakatan Harapan labuh maya Langkah Shereton ba taun 2020.
“Pengundi lebih nemu sapa ti pemadu negika hak rayat, sereta betukar parti ukai uaki reti merejuk laban tiap iku orang ngembuan integriti,” ku iya ti kala nyadi chalun maya PRN12 sebedau tu.
Iya indu Bidayuh keterubah bediri minta pilih ba Parlimen Puncak Borneo maya PRU15 tu ngembuan visyen terus negi pekara ke didegika penyakal ngelama tu iya nya numbangka perintah ke diatu.
Ex-pengajar tu madahka perintah baru patut ditumbuhka sereta patut beresi.
"Pengudah PRU15 tu kitai ngarapka deka ngembuan siti perintah baru ti beresi, tegap enggau adil ngagai semua bansa," ku indai ngagai tiga anak tu.
Ditanya nama pekara ti deka dikemerat ba Parlimen Puncak Borneo ba PRU15, Iana madahka lebih ngagai pengawa ngangkatka tikas ekonomi rayat.
Iya ti kala bediri minta pilih ba DUN Serembu maya PRN sebedau tu mega madahka infrastruktur ba Parlimen tu mega patut dikemanah agi kelimpah ari ngemeratka isu peluang kereja enggau raban orang.
"Kami deka mai isu ekonomi, bakani ulih ngangkatka tikas penatai pemisi rayat berindik ari ungkus idup ti tinggi. Laban kitai nemu mayauh menua berengkah ngiga jalai bakani deka mantu rayat laban nemu ekonomi majak enda meruan.
"Ari segi infrastruktur, di Parlimen Puncak Borneo agi tinggal, ari segi peluang gawa pengudah abis belajar enggau universiti mega nadai laban perintah ke diatu enda ulih nyendiaka peluang gawa, nya alai pekara tu deka dikemerat.
"Ketiga, aku deka negika hak orang indu, bakani deka nyungkakka ekonomi orang indu," ku iya nyebut entara pekara difokus iya.