SIMANGGANG: Penyukung Gabungan Parti Sarawak (GPS) enggau Parti Sarawak Bersatu (PSB) datai enggau penyampau tubuh ti mayuh ba Stadium Tertutup Kompleks Lumba enggau Main Sri Aman maya hari ngantung nama chalun kemari.
Kededua kaban parti nya udah berengkah bejalai bebala mayuh ke stadium berengkah pukul 8.30 pagi begulai enggau chalun parti diti iya nya Dato Sri Doris Sophia Brodie ari GPS-PRS enggau Wilson Entebang ari PSB.
Kededua parti tu ngibauka tamba parti diri seraya bejalai enggau panjung ngeringka parti bala chalun ti minta pilih kelai penegap sukung sida.
Sama bisi datai iya nya Kaban Kunsil Nengeri (ADUN) Balai Ringin Datuk Snowdan Lawan ti mega Sapit Menteri Dagang Temuai, Industri Kreatif enggau Seni Pemerindang, ADUN Bukit Begunan Datuk Mong Dagang enggau ADUN Simanggang ti mega Sapit Menteri Pemansang Pengelandik Sarawak Datuk Francis Harden.
Pengudah nya, penatai di palan ngantung nama chalun iya nya pengari ari Pakatan Harapan Tay Wei Wei enggau penyukung ti enda tentu mayuh, lalu ditangkanka enggau penyandang Parlimen Datuk Masir Kujat ti disempulang penyukung ti sama mayuh.
Masir ngetanka kerusi tu nyadi chalun ti ngatika diri maya pengawa bepilih sekali tu.
Sri Aman deka diperebutka empt penyuru entara Masir, Doris, Wilson enggau Tay.
Empat chalun tu udah dipadahka Pemesai Pengawatu Pengawa Bepilih ungkup Parlimen Sri Aman, Elvis Didit kena pukul 11:58 pagi kemari.