KUCHING: Pengundi Parlimen Betong dikearap terus ngetanka status 'quo' nyadi penyukung pemadu talukka perintah ba Pengawa Bepilih Besai Ke-15 (PRU15).
Ex-Sapit Kepala Menteri Datuk Patinggi Tan Sri Alfred Jabu Numpang madah, pengundi Parlimen Betong nyadi penyukung ti talukka perintah lebih ari 40 taun ke udah.
Berindik ari pekara nya, ex- Kaban Kunsil Nengeri Layar tu minta pengundi parlimen tu meri sukung ngagai chalun Gabungan Parti Sarawak (GPS) Dr Richard Rapu,59, ke nyadi chalun baru ba Parlimen Betong maya PRU15.
"Aram kitai semua nurun meri sukung ngagai iya (Dr. Richard Rapu). Dalam timpuh dua minggu ke deka datai pengudah ngantung nama, aram semua kitai gawa enggau bebendar sereta beserakup nentuka iya ulih menang enggau majoriti tegap tauka besai," ku iya seraya madahka Dr. Richard Rapu siku lutur jelu ke dilatih nyadi chalun baru.
Jabu madahka pekara nya ba pengawa miring ke diatur ba rumah Dr Richard Rapu empu di rumah panjai Danau, di Betong, kemari.
Pengawa miring ti betuaika Temenggong Richard Mulok enggau ketuai raban bansa ke bukai kena minta berekat ari Tuhan ke pemujur Dr. Richard Rapu maya PRU15.
Nambah nya, Jabu lebuh ke ngenang pasal GPS madahka GPS platform politik pemadu tegap, beserakup sereta relevan ungkup semua rayat Sarawak.
Nya alai amat beguna rayat Sarawak nyukung semua 31 iku chalun GPS maya pengawa bepilih besai, 19 November tu ila.
"Nya pekara ke patut dikereja kitai dikena ngenegap sereta ngeringka baru GPS," ku iya seraya madah pemujur chalun GPS ba Parlimen Betong deka nentuka semua projek enggau program pemansang ari baruh Ejensi Pemansang Bagi Menua Betong (BDDA) ti diungkupka nengah belanja RM200 juta ulih dipejalaika enggau lanchar.
Dulu ari nya, pengawa miring ungkup Dr Richard Rapu mega bisi diatur ba rumah panjai Jabu di Gensurai, Layar, di Betong.
Sama bisi ngulu pengawa tu, Sapit Premier Sarawak ti mega ADUN Bukit Saban Datuk Amar Douglas Uggah Embas, Sapit Menteri Pemansang Nembiak, Lumba enggau Main ke mega ADUN Layar Datuk Gerald Rentap Jabu, enggau Tan Sri Empiang Jabu, Mantan Parlimen Betong Datuk Robert Lawson Chuat.