Bechuanka pemujur iya ngubah Sibujaya nyadi kandang menua ti mansang sebedau tu
“Pechaya mih,nya deka begunaka timpuh. Aku bisi konsultan ti dikemendarka, konsultan menua tu enggau antarabansa ti kala ngaga projek di Holland, Denmark enggau Singapura. Sida deka ngaga perambu ungkup Sibu, tang begunaka timpuh”
Datuk Patinggi Tan Sri Abang Johari Tun Openg
Premier Sarawak
SIBU: Premier Sarawak Datuk Patinggi Tan Sri Abang Johari Tun Openg arap amat ati Gabungan Parti Sarawak (GPS) ulih ngubah Sibu sama baka iya ngubah Sibujaya nyadi kandang menua ti mansang sebedau tu.
Ku iya, mayuh amat perambu pemansang udah disediaka nyengkaum jalai baru ti nyambung Sibujaya enggau Kong Yit Khim, jalai nyambung roundabout Jalai Aman ke Jalai Tunku Abdul Rahman, jalai nyambung Jalai Ulu Sungai Merah ke Jalai Tunku Abdul Rahman enggau Jalai Teku Pasai Siong ngagai kandang menua Kemunyang.
Ku iya, jalai Salim ke Jalai Kong Yit Khim deka ditukar ngagai dua lurung lalu bisi pemansang ungkup Bukit Assek ba bagi tengah Sibu.
Abang Johari ke mega Chairman GPS madah, tu ukai semina bejaku aja, tang perintah GPS ulih ngaga nya.
“Pechaya mih,nya deka begunaka timpuh. Aku bisi konsultan ti dikemendarka, konsultan menua tu enggau antarabansa ti kala ngaga projek di Holland, Denmark enggau Singapura. Sida deka ngaga perambu ungkup Sibu, tang begunaka timpuh.
“Taja pia, juluk ati kami ungkup Sibu,kami dekaka Sibu nyadi palan dagang temuai nyadi baka Amsterdam di Belanda. Nya deka begunaka belanja besai, tang dalam siti timpuh, kami ulih ngemansangka Sibu,” ku iya madah maya pengerami Sarawakku Sayang 2022 ba Dewan Suarah Sibu,kemari.
Iya madah, maya iya nyadi Menteri Pengawa Berumah,iya meda visyen ngubah Sibujaya, lalu diatu Sibujaya udah berubah nyadi sebuah pasar ti regas baka ke dipeda ba maya ke diatu.
Nya alai,iya dekaka transformasyen ti sama ungkup Sibu.
"Enti aku ulih ngubah Sibujaya, aku pechaya, kitai nyadi siti tim, kita ulih ngubah Sibu," ku iya.
Iya pechaya bisi angin mai ubah ngagai Sibu ungkup pemansang positif sereta ngansak meri kuasa ngagai chalun GPS, Clarence Ting enggau Wong Ching Yong ngarika Sarawak ba parlimen.
Iya arap amat ati, gaya di Sarawak enggau Sibu jemah ila deka nyadi manah ungkup rebak dudi.
Ku iya, perintah GPS udah nyapai mayuh amat pekara nyengkaum ngambi pulai hak ari baruh Sempekat Malaysia 1963 (MA63), ngaga jembatan dikena nyantilka tetiap bagi menua Sarawak, mambahka asil enggau ke bukai.
Iya mega madah, GPS deka nempa juluk ati Sarawak ungkup rayat Sarawak nyajdi sebuah negeri maju manggai ba taun 2030.
"Naka ke diatu,mensia mayuh nemu Sarawak bisi polisi ti manah bekaul enggau energi," ku iya.
Nya alai, ngansak mensia mayuh engkah Sibu dalam perintah. Iya minta sukung penuh ambika ulih menang ba semua 31 kerusi maya Pengawa Bepilih Besai tu ila.
Berebak enggau nya,Kaban Kunsil Negeri Nangka Datuk Dr Annuar Rapaee ngansak rayat Sibu anang kelalu emosyen sereta ngelempaika pengarap ba ketuai GPS.
Ku iya, pengandal ti diberi ngagai GPS kenyau ari pengawa bepilih negeri suba, mesti dipajakka maya Pengawa Bepilih Besai Ke-15 (PRU15).
Maya pengerami nya, Abang Johari mega bisi meri RM1.5 juta ngagai dua buah sekula primari China iya nya SJK(C) Kiew Nang enggau SJK(C) Dung Sang.
Sama bisi ngulu pengerami nya, Sapit Premier Datuk Dr Sim Kui Hian, ADUN Pelawan Michael Tiang enggau ADUN Bukit Assek Joseph Chieng.