Dikarang Rengenyan Labang
KUCHING:Program pemansang Orang Dagang Wellbest (UWB) Opis Pengelantang Pendiau Raban Bansa Sarawak (JKMS) mujur nyungkak penatai pemisi ninting bulan ungkup 1,004 iku raban ti tauka penerima bantu produktif ke ngambi bagi dalam program dagang, ti lalu mujur ngemansutka raban tu pansut ari garis seranta.
Menteri Pemansang Orang Indu, Nembiak Mit enggau Pengelantang Pendiau Raban Bansa, Dato Sri Fatimah Abdullah madahka, program pemansang enggau ngenegapka raban ti patut nerima bantu nengah chara meri geran pemungkal kena bejalaika projek tauka dagang ungkup raban ti patut nerima bantu JKMS tauka Ahli Isi Rumah (AIR) ke agi produktif awakka ulih nyungkakka penatai pemisi, tikas ekonomi enggau pengidup sida.
Pekara nya amat beguna awakka raban ke patut nerima bantu ari JKMS ulih idup ngatika diri enggau ulih pansut ari lis penerima bantu, ku iya.
"Bepelasarka rikod ari taun 2013 ngagai bulan Julai 2022 bisi 1,004 iku Orang Dagang Wellbest (UWB) mujur nambah tauka nyungkakka penatai pemisi sida nengah program UWB tu.
"Objektif inisiatif tu kena nambah tauka nyungkakka penatai pemisi ninting bulan penerima bantu produktif ke ngambi bagi dalam program dagang awakka ulih pansut ari garis seranta.
"Ba taun 2022, bepelasarka KPI Welfare Score Card, tagit UWB mujur iya nya 10 peratus tauka 127 ari penyampau UWB ke diajar tauka diiring naka bulan November 2021 iya nya 1,269, bisi 154 iku UMB udah mujur nambahka penatai pemisi sepenyampau RM1,200 iya nya ngelui ari tagit ke udah ditetapka sereta sida tu udah diketuka ari nerima bantu pengintu pengelantang pendiaum" ku iya.
Fatimah madahka pekara nya dalam jaku iya ke dibacha Kaban Kunsil Negeri Kota Sentosa Wilfred Yap Yau Shin ti ngarika iya behadi Anugerah Usahawan Wellbest 2022 JKMS ke diatur ba Farley Mall, Kuching ditu, kemari.
Ba pengerami tu kemari bisi 48 iku UMW ke nyulut ba dagang sida nerima anugerah ti nyengkaum Kategori Bronze bisi 8 iku, Silver (12), Gold (11), Diamond (9), Platinum (7) enggau siku (1) menang Kategori Ikon. Sereta semua penermia anugerah tu nerima tropi, setipikit enggau mata duit.
"Inisaitif ngaku UWB nyulut tu kena ngangkatka motivasyen UWB awakka terus bebendar ngerembaika dagang sida enggau ulih besemekih.
"Maya Konvensyen Keushawanan Sosial ke udah diatur kena 22 September 2022 di Cyverjaya, UWB Sarawak iya nya Rus Sitah Ali udah diaku nyadi Usahawan Jaya JKMM enggau penatai pemisi pukul rata RM13,000 ngagai RM28,000 sebulan," ku iya.
Kelimpah ari nya JKMS deka nentuka kualiti latih enggau iring ba pengawa dagang tu ulih nangkup peminta UWM enggau orang ke ngajar UWB sereta scenario ekonomi enggau kanvas dagang diatu, ku iya, JKMS bebendar nempa kerejasama enggau ejensi penyedia latih dagang iya nya Institut Keusahawan Negara (INSKEN).
Ku iya, program kerejasama berengkah ba bulan Julai nyentuk September taun tu nengah pengawa ngatur dua program latih iya nya Business Facilitation Training Programmed (BFTP) mujur dipasuk 60 pesereta enggau Kursus Asas Keusahawanan (KAK) udah dipasuk 90 iku UWB.
Kelimpah ari pengerami Anugerah Usahawan Wellbest, JKMS mega bisi ngatur Karnival Jualan zon selatan ke diatur ba palan ke sama enggau kerejasama Farley Kuching Mall Supermarket berengka 23 Oktober 2022 ngagai 4 November 2022.
"Nyerumba karnival tu, Farley Kuching iya nya rengkayan palan bebeli barang besai keterubah di Sarawak nyadi bakih kunsi JKMS nyual produk Wellbest.
"Objektif enggau impak kerejasama tu dalam bidang nyual produk Wellbest UWB iya nya kena ngerembaika makit produk UWB ngagai semua pampang Farkey di serata Sarawak sereta nambahka asil UWB," ku iya seraya madah bisi tiga UWB udah dipilih nyadi pemekal produk ngagai Farley.
Sama bisi ba pengerami tu kemariDirektor JKMS Noriah Ahmad enggau sida ke bukai.