KUCHING: Dr. Richard Rapu deka neruska perambu pemansang kelebih agi ngangkatka ekonomi ba sitak Parlimen Betong.
Iya ti nyadi chalun Gabungan Parti Sarawak (GPS) ba sitak Parlimen Betong maya Pengawa Bepilih Besai Ke-15 (PRU15),madahka diri deka nampung legasi ex-Parlimen nya baka Datuk Amar Douglas Uggah Embas ti lalu ditampung Datuk Robert Lawson Chuat.
“Kami deka nampung perambu ke udah digaga sida ti chukup manah di Parlimen Betong, enggau pekara bukai nitihka lalau ketuai renggat tinggi lalu deka meri kerejasama ngagai ketuai parti.
“Entara batang langgur penemu iya nya ekonomi rayat baka ba betanam betupi moden, pengawa dagang ti bekaul enggau raban nembiak,” ku iya ngenang entara pekara difokus iya.
Iya ke mega Sekretari Politik Premier Sarawak dirandau raban pengarang berita pengudah iya nerima surat chiri nyadi chalun GPS maya PRU15, ti disuaka Chairman GPS ke mega Premier Sarawak, Datuk Patinggi Tan Sri Abang Johari Tun Openg ke diatur ba Indu Opis PBB ditu, kemari.
Nambahka nya, Dr. Richard Rapu mega madahka ba Parlimen Betong, parti PBB nyendia sereta ngatur mayuh program kelebih agi ungkup raban nembiak.
“Mayuh program ungkup raban nembiak sitak Parlimen Betong lalu pemesai kitai ketuai mayuh ngatur program ti endang dilangkar ungkup raban nembiak kena matak pengerindu sida, enggau kena ngulihka sukung sida tu ngagai GPS nengah rambai jaku kitai ‘Sarawak First’,” ku iya.
Ditanya bekaul enggau pemar ke ditapi iya kelebih agi keterubah nyadi chalun ba pengawa bepilih, iya madahka sedia napi macham pemar kelebih agi diatu jeman teknologi enti dibandingka dulu suba.
Iya madahkate tetiap iku nyengkaum raban pengawa bepilih parti patut matih diri sereta landik bekenaka gajet enggau media rama.
“Pemar ke ditapi mayuh, entara nya baka diatu bisi media rama ti jauh bebida enggau 15 tauka 20 taun ke udah. Diatu semua ba ujung jari, asalka bisi WIFI, internet, nya bida enggau pemar ke pemadu besai ke ditapi,” ku iya.