KUCHING: Mensia mayuh dipinta nitih sereta ngasika jaku tangkan Opis Menteri Pengerai (KKM) laban menusa agi betapi enggau gelumbang mit kes COVID-19 berindik ari subvarian Omicron XBB ke bisi ditemu.
Sapit Premier Sarawak Datuk Amar Douglas Uggah Embas madah, iya minta semua rayat Sarawak bejejaga kena nagang pengelekai rampit ke balat agi.
“Kita (rayat) patut lebih bejejaga belama kelebih agi maya Pengawa Bepilih Besai Ke-15 (PRU15) tu ila.
“Kena sengkabung idung enggau mulut maya ba endur ke dedat,” ku iya.
Iya madah munyi nya lebuh dirandau media pengudah bejadi Gempuru enggau Pemandang Pengelikun enggau Pengerai Kereja Borneo (BOSH) Ke-7 ba sebuah hotel ditu, kemari.
Uggah ke mega Chairman Komiti Mutarka Penusah Ngenyit Negeri Sarawak (JPBNS) madah, atur bejejaga patut diambi laban Sarawak mengkang ngerikodka kes COVID-19 tiap hari.
"Sehari tu kitai bisi 48 kes COVID-19. Nya (COVID-19) agi bisi,nya alai anang enda bejejaga.
“Enggau pemisi subvarian baru (Omicron XBB) ti enda ditemu kitai tikas pemisa iya, patut amat kitai majak bejejaga.” ku iya.
Dulu ari tu, Menteri Kesihatan Khairy Jamaluddin madahka Malaysia diatu betapi enggau gelumbang mit ti ngujungka kes COVID-19 bisi nambah pengudah ke tetemuka subvarian Omicron XBB di menua tu.
Ku iya, nitihka gaya data ninting hari,penyampau kes baru COVID-19 nambah 16.5 peratus, ari 14,525 kes maya Minggu Epidemiologi (ME) 42 ngagai 16,917 kes maya ME 43 (23 Oktober nyentuk 29 Oktober).
Ku Khairy, penyampau pesakit COVID-19 ti dipasuk ngagai fasiliti pengerai (sepital perintah) ungkup tetiap 100,00 iku peranak menua mega dipeda bisi nambah 14.3 peratus maya ME 43 enti dibandingka enggau ME 42.
“ Kami melabaka trend nambah tu datai ari subvarian XBB ti nyadi pun gelumbang di Singapura ti begunaka timpuh tiga nyentuk empat minggu enda surut.
"Kitai mega engka betapi enggau rampit varian XBB lalu empat kes udah ditemu nyentuk 27 Oktober ltu tadi,” ku iya madah maya aum media di Putra Jaya kena Hari Satu tu tadi.