Anda di sini

Ngadaka 200 iku lutur dalam lima taun

Advertisement

Sida tau belatih ba Sepital Pengajar UNIMAS nengah program 'housemanship' kena nambahka penyampau lutur kitai: Abang Johari

Abang Johari seraya disempulang Kadim begambar  enggau 35 iku graduat kohort keterubah Ijazah Sarjana Muda Program Perubatan, Fakulti Perubatan dan Sains Kesihatan, ke bulih skolarship penuh ari Yayasan Sarawak, kemari.
Abang Johari seraya disempulang Kadim begambar  enggau 35 iku graduat kohort keterubah Ijazah Sarjana Muda Program Perubatan, Fakulti Perubatan dan Sains Kesihatan, ke bulih skolarship penuh ari Yayasan Sarawak, kemari.

Dikarang Rengenyan Labang

KOTA SAMARAHAN: Raban graduet perubat tauka lutur ke udah nyadi penerima skolarship ari Perintah Sarawak nengah Yayasan Sarawak, deka disedia ungkup belanja enti deka nampung pelajar renggat tinggi ngambi 'kursus lanjutan' dalam sekeda bidang tauka latih lutur pakar.

Premier Sarawak, Datuk Patinggi Tan Sri Abang Johari Tun Openg madah, bisi 35 iku graduat kohort keterubah Ijazah Sarjana Muda Program Perubatan, Fakulti Perubatan dan Sains Kesihatan, ke bulih skolarship penuh ari Perintah Negeri Sarawak nengah Yayasan Sarawak, nerima skrol maya pengerami Konvokesyen Universiti Malaysia Sarawak (UNIMAS) ke-26.

“Tagit kitai iya nya dalam timpuh lima taun, kitai ulih ngadaka 200 iku lutur laban kitai ari segi ratio kitai agi baruh, penyampau lutur enggau penyampau tubuh mensia (lutur: tubuh mensia).

“Kedua, UNIMAS bisi Sepital Pengajar (Teaching Hospital) kediri empu, nya alai program 'housemanship' sida ulih diengkah ba sepital UNIMAS lalu tu mega nambahka penyampau lutur kitai.

“Enti sida (penerima skolarship ari Yayasan Sarawak tu) mujur jemah ila, sida engka nampung pelajar dalam bidang khas. Aku (Perintah Sarawak) enggau Yayasan Sarawak udah tentu meri skolarship ngagai sida ke ngambi kursus lanjutan dalam bidang ke bekaul tauka pakar,” ku iya.

Abang Johari ti mega Pro-Canselor UNIMAS madahka pekara nya lebuh dirandau raban pengarang berita pengudah ngulu pengerami Konvokesyen UNIMAS Ke-26 ti diatur ba DeTAR PUTRA di UNIMAS ditu, kemari.

Nitihku iya, dalam timpuh setaun kapasiti ke diberi skolarship ari Yayasan Sarawak ungkup bidang perubat tu urung 50 iku.

“Juluk ati kitai (Sarawak) deka nempa 200 iku lutur dalam timpuh lima taun, lalu sida tu ulih gawa di negeri kitai nyengkaum ngagai menua pesisir.

“Pia mega dalam bidang bukai ti deka ngelala bagi bidang kena kitai meri penemu pasal  tranformasyen ekonomi enggau servis ti benung nyingkang ngagai 2030,” ku iya.

Bekaul enggau bala graduet lutur nya, iya madah sida nya tau belatih ba Sepital Pengajar (Hospital Pengajar) UNIMAS.

“Udah tembu belatih nya sida tu ulih meri servis enda ngira dini alai opis perubat tauka engka tau enggau ba sepital peribit.

“Ari tu kitai ulih nyadi palan referan ungkup pengerai. Baka sida Indonesia tau datai kitu, lalu tu tau nyadi dagang temuai – perubat.

Berebak enggau tu, iya madahka perintah negeri ukai semina mekuh ngagai siti bidang tang deka ngerandang bidang bukai ke bisi peminta enggau guna negeri.

Ungkup Sarawak ku iya, deka ngeluarka hidrogen lalu udah tentu begunaka orang ti pandai enggau bepenemu dalam bidang biokimia, kelimpah ari mayuh agi eknomi baru ke deka diaduka negeri tu.

Sama bisi maya aum pengarang berita nya kemari, Mandal Canselor UNIMAS, Prof Datuk Dr Muhamad Kadim Suaidi sereta sida ke bukai.

Advertisement