Nya kebuah jaku ti madahka Sarawak negeri seranta nya nadai pengamat iya, pia ku Abdul Karim
“Enti kitai meda ari segi duit taruh,bakani kitai tau madahka negeri tu seranta enti kitai bisi lebih RM30 bilion”
Dato Sri Abdul Karim Rahman Hamzah
Menteri Dagang Temuai, Industri Kreatif enggau Mandangka Seni
KUCHING: Jaku ti madahka Sarawak negeri seranta nya nadai pengamat laban rizab duit taruh negeri tu lebih ari RM30 bilion.
Menteri Dagang Temuai, Industri Kreatif enggau Mandangka Seni, Dato Sri Abdul Karim Rahman Hamzah madahka penyampau duit taruh nya ti pemadu mayuh enti dibandingkan enggau semua negeri dalam Malaysia.
“Enti kitai meda ari segi duit taruh,bakani kitai tau madahka negeri tu seranta enti kitai bisi lebih RM30 bilion.
“Semua duit taruh negeri bukai enti digumpul penyampau iya enda datai setengah, lalu bisi mega enda datai RM15 bilion. Bakani kitai dipadahka nyadi negeri seranta,” tanya iya.
Iya bejaku munyi nya maya aum media 'Deka Fit Sarawak 2022' ba dewan aum Mulu di begunan Baitulmakmur II ditu, kemari.
Ku Abdul Karim, pekara nya mega tau dipeda lebuh Sarawak ngena duit diri empu ngaga pemansang baka ngaga jalai tebing pantai, jematan enggau ke bukai.
"Taja pan nya tanggungpengawa Opis Menteri Pemansang Menua Pesisir, tang perintah negeri tetap neruska pemansang laban ngembuan mayuh rizab duit taruh,” ku iya.
Tambah mega, Sarawak deka numbuhka 'Dana Kekayaan Berdaulat', pia ku Mandal Presiden Parti Pesaka Bumiputera Bersatu (PBB) nya.
“Enti negeri tu ulih numbuhka duit turu tu, reti nya kitai bisi mayuh duit lebih... seranta ke enda kitai?” ku iya.
Abdul Karim mega madah, statistik penyampau penyeranta sesebuah negeri ti diambi ari penyampau penerima bantu e-Kasih, patut dilangkar baru laban nya enda betul.
"Sesapa ti ari baruh Pendapatan Garis Kemiskinan (PGK), tau minta bantu nya lami kami meda tebal agi ti minta iya nya orang bumai bekebun enggau orang berikan.
"Nya ukai mandangka pekara ke amat. Nya alai, chara ngitung penyampau penyeranta tu mesti dipansik baru ambika ulih nentu sekalika sesebuah negeri nya seranta tauka enda," ku iya.
Bekaul enggau Bantu Keluarga Malaysia (BKM), sekalika patut dipajakka perintah baru pengudah Pengawa Bepilih Besai Ke-15 (PRU15), Abdul Karim madahka nya patut dipejalaika.
"Semua kategori peranak menua mesti dibantu sekalika sida iya umang, bala nembiak enggau ke bukai.
“Anang mantu maya musim pengawa bepilih aja. Rayat enggau pengundi seruran beratika nya," ku iya.