SIBU: Sapit Premier Sarawak Datuk Amar Douglas Uggah Embas minta Gerempung Nasional Dayak Sarawak (SDNU) ngambika bekerejasama enggau Gerempung Nasional Dayak Bidayuh (DBNA) dalam mantu raban bansa tu ngelengkaska proses nyukat tanah Hak Adat Bansa Asal (NCR).
Nitih ku iya, DBNA udah nyapai pemujur ti patut nyadika chunto lebuh mantu komuniti raban bansa nya di sebuah kandang menua dalam pengawa ngatur ngemansutka surat pala tanah nitihka Seksyen 6 enggau Seksyen 18 Kanun Tanah Negeri enggau lengkas.
“SDNU patut berandau sereta belajar chara ari DBNA bakani sida ulih ngatur proses nya enggau ransing sereta lengkas ungkup komuniti di sebuah kandang menua.
“Aku mega belajar ari sida laban aku baru aja nguna chara sida dalam ngelengkaska pengawa ngatur pekara nya di sitak aku,” ku iya maya Pengerami Makai Lemai Ngelalu Deligit Beserimbai enggau Aum Besai Tiga Taun Sekali (TGM) SDNU Ke-36 di sebuah hotel tebilang ditu, bedau lama ti udah.
Sama bisi datai iya nya Sapit Menteri Pengerai Mensia Mayuh, Pengawa Berumah enggau Kaunsil Kandang Menua I Micheal Tiang, Kaban Kunsil Nengeri (ADUN) Bukit Assek Joseph Chiang, ADUN Ngemah Anyi Jana, Presiden SDNU Tan Sri William Mawan Ikom, Sapit Presiden SDNU Christopher Gira Sambang, Chairman SDNU Pampang Sibu Chambai Lindong sereta temuai dipebasa ke bukai.
Ku Uggah madah, nyema proses tu ulih dipejalaika agi enggau lengkas, surat pala tanah mega ulih dipansutka enggau jampat.
Ku iya nerang, tu udah nyadi komitmen perintah Gabungan Parti Sarawak (GPS) dalam meri surat pala tanah ngagai rayat.
“Kitai enda besemaya, tang deka bebendar enggau pengabis manah ungkup tuju nya. Nya alai, tu endang tanggungpengawa SDNU dalam timpuh tiga taun tu dikena mantu komuniti ngelengkaska proses nyukat tanah NCR enggau chara belajar ari DBNA,” ku iya.
Iya nandu baru, perintah GPS seruran nemu bekaul enggau pengiruh pengempu tanah bekaul enggau isu beempu tanah NCR.
Ku iya nerang, proses nyukat tanah NCR deka nyadi proses ti meruan ke alai taun tu perintah udah ngagihka sepenyampau RM40 juta ungkup tuju nya.
“Nyentuk 30 April 2022, sukat kelingi survei udah dipejalaika ungkup pemesai 1,031,712 hektar tanah. Ari penyampau tu, urung 794,503 hektar udah digazet ari baruh Seksyen 6.
“Pemesai 195,975 hektar lot individu udah dikemendar ngambika disukat ke alai 66,808 hektar udah disukat. Pia mega, 54,072 lot tanah individu udah disukat ari baruh Seksyen 18,” ku iya nerang.
Beserimbai enggau tu, Uggah masa pengeransing SDNU ti chukup chakah ngerembaika visyen enggau misyen juluk sebuah gerempung ukai dikuasa perintah (NGO) ti bepelasarka komuniti Dayak.
“Aku chukup temegah ati enggau pemujur SDNU ke diatu bisi kaban datai lebih ari 20,000 iku ari 48 pampang di selampur nengeri.
“Tu iya nya NGO ti pemadu besai di Sarawak lalu tu mih sada pemadu besai Dayak dalam NGO.
“Aku chukup pechaya ari baruh pegai Mawan enggau Gira, SDNU deka terus relevan lalu nyadi sada ti kuat dalam megai tanggungpengawa besai sereta berat ngarika komuniti Dayak kelebih agi dalam isu bekaul enggau raban bansa Dayak jemah ila,” ku iya nambah.