Ngambika ulih ngasai pengelantang menua jemah ila kelebih agi Sarawak udah bisi Wawasan 2030
“Kelebih agi kitai bisi Wawasan 2030 (Strategi Pemansang Pengudah COVID-19 2030) lalu tu deka diteruska ungkup rebak ti deka datai."
Datuk Patinggi Tan Sri Abang Johari Tun Openg
Premier Sarawak
KUCHING: Pekara pemansang di Sarawak deka terus dipejalaika dalam nama pan gaya ti nyadi ungkup pemaik raban nembiak rebak baru, ku Premier Sarawak Datuk Patinggi Tan Sri Abang Johari Tun Openg.
Nitih ku iya, perintah Sarawak iya nya Gabungan Parti Sarawak (GPS) seruran tegap enggau langkar pemansang iya dikena ngangkatka sektor pekara wang nengeri.
“Kelebih agi kitai bisi Wawasan 2030 (Strategi Pemansang Pengudah COVID-19 2030) lalu tu deka diteruska ungkup rebak ti deka datai.
“Bulan November tu, kitai deka mantaika dana pemisi maya aum Kunsil Nengeri (DUN) ungkup raban nembiak.
“Tu beguna ngambika sida (raban nembiak) ngembuan siti penuduk ti teguh ari sukut belanja enggau ekonomi.
“Kelimpah ari nya mega meda ngagai pelajar ti tinggi agi ngambika pemansang pengelandik ti dipejalaika diatu engkeman enggau ubah ekonomi ti bepelasarka ekonomi baru,” ku iya lebuh ti ditanya pengudah ngemunka Raban Pengawa Bekimpin Nembiak GPS di Stadium Perpaduan, ditu, kilah ensanus.
Beserimbai enggau nya, Abang Johari ti mega Chairman GPS madah, ekonomi baru dunya diatu iya nya bekaul enggau rampa menua.
“Diatu, Sarawak dalam timpuh enam taun ti deka datai ngembuan juluk nyadi pengeluar hidrogen besai di dunya.
“Berindik ari nya, seagi bisi GPS seagi nya pemujur Sarawak jemah ila ulih dipeda manah kelebih agi kitai bisi polisi 2030 lalu tu ketegal Sarawak ngembuan ketuai ti bisi kualiti. Kitai bisi kulaiti,” ku iya.
Beserimbai enggau tu, Ketuai Nembiak GPS Miro Simuh dalam jaku pengelalu iya ngarapka raban nembiak megai tanggungpengawa ti besai maya PRU ila.
“Langkar program kimpin di kandang menua kita lalu kitai sedia mantu ari sitak Telok Melano nyentuk ke Lawas.
“Kitai mega patut meda pemujur GPS maya Pengawa Bepilih Nengeri Ke-12 (PRN12) ke udah lalu jadika nya ke peransang ti beguna ungkup pengawa bepilih sekali tu,” ku iya.
Ku iya nerang, pengeransing PRN12 patut dibai di tetiap sitak di Sarawak iya nya perintah GPS ti pemadu manah lalu nyadi sebagi ari numbuhka perintah besai.