KUCHING: Pekara ti dikemerat enggau bajet khas patut diagihka dalam nentuka isu tu enda meri empas negatif ngagai menua kelebih agi ungkup rayat Sarawak.
Senator Ahli Dewan Negara, Senator Jaziri Alkaf Abdillah Suffian mansutka penerang tu berindik ari musin Pengawa Bepilih Besai Ke-15 (PRU15) ti deka diatur enda lama agi.
“Aku berunding iya nya sebarang parti ti mekuh lalu ngemeratka pekara bekaul enggau pengelikun sereta pemerat Malaysia sereta Sarawak, kelebih agi ari sukut aset tauka reta raban soldadu patut dikemerat.
“Kami enggau 'lip-service' tauka penerang ti sengapa ari sebarang raban; nama ti deka dipeda kami iya nya chara mutarka ti lengkas ari perintah nengeri enggau perintah besai, kelebih agi Opis Menteri Pengelikun dalam pekara tu,” ku iya nyemetak bekaul pekara tu.
Malaysia endang patut berundingka chara nyikap diri enggau silik berindik ari krisis geopolitik ti majak nyadi lalu tu udah dipeda ari konflik Russia-Ukraine.
Mayuh mega udah nemu bekaul enggau tikas 'penuai' kereban raban soldadu menua – bedau lama ti udah rayat kelebih agi di Sarawak.
“Kitai chukup tekenyit lebuh t nemu iya nya bisi seraka ti besai entara Malaysia enggau menua sepiak dalam pengawa melanja senentang pekara pengelikun menua enggau modenisasyen aset raban soldadu menua diri.
“Menua sepiak Indonesia udah diripotka melanja nyentuk USD125 bilion dalam langkar modenisasyen raban soldadu sida.
“Thailand, kelimpah ari penyarut pandemik COVID-19 udah mega melanja nyentuk USD7 bilion ninting taun dalam puku rata lima taun ke udah ungkup pemaik sukut pengelikun,” ku iya nambah.
Vietnam ke suba dipadahka tinggal di belakang Malaysia, diatu udah ulih melanja nyentuk USD5.5 bilion diagihka ungkup pengelikun menua.
Nyema menua tu besemekih lalu nentuka pengelikun sereta pemerat menua, nyengkaum Sabah enggau Sarawak tejaga enggau likun, menua tu patut beamai-amai ngagih enggau ngemerat pekara bekaul enggau ngemaruka aset menua ti udah lama.
Mayuh udah insiden ti pemadu baru nyadi bedau lama ti udah ke ulih dikumbai deka nyarutka pemerat menua, nyengkaum penama ti nadai pemendar ari mayuh raban nyengkaum ari menua ti bisi peminta besilih lalu enda kurang mega baka China di Tasik China Selatan.
Bisi ditemu repik roket di Sarawak sereta risiko kena keruga ti majak nyadi ari pengawa tama ti nadai pemendar ba kandang langit Malaysia Timur ti ulih ngujungka enda lantang ati ngagai rayat Sabah bekaul enggau pengelikun menua, ku iya nambah.