SIBU: Gerempung Nasional Dayak Sarawak (SDNU) ukai platform dalam ngaga penerang nyakal perintah.
Presiden SDNU Tan Sri William Mawan Ikom madah, kaban SDNU patut ngelengkaka ideologi politik sida ba luar lalu enda mai nya tama ke dalam gerempung tu.
“Politik ulih mambarka kitai. Tu ulih ngasuh kitai bebida penemu ti ulih ngujungka laya.
“Nyema disegulaika enggau politik udah tentu tetiap pekara ti deka dipejalaika SDNU nyangka enda meri asil lalu tu ulih ngasuh semua pangku pengawa tejanggal,” ku iya lebuh ti bejaku pengelalu maya Pengerami Makai Lemai Ngelalu Deligit Beserimbai enggau Aum Besai Tiga Taun Sekali (TGM) SNDU Ke-36 ti diatur ba sebuah hotel tebilang ditu kena malam Hari Lima.
Sama datai iya nya Sapit Menteri Pengerai Mensia Mayuh, Pengawa Berumah enggau Kaunsil Kandang Menua I Micheal Tiang, Kaban Kunsil Nengeri (ADUN) Bukit Assek Joseph
Chieng, ADUN Ngemah Anyi Jana, Sapit Presiden SDNU Christopher Gira Sambang, Chairman SDNU Pampang Sibu Chambai Lindong enggau temuai dipebasa ke bukai.
Iya nyamin iya nya kaban SDNU sedia segulai sejalai lalu ngenegapka solidariti entara sama diri dikena ngemansangka komuniti ngena platform gerempung tu.
“Kitai deka nyeliahka isu politik lalu nentuka SDNU tu dikena nyadi platform ngemansangka Dayak dalam mayuh macham pekara ti bekaul,” ku iya ti mega ADUN Pakan meri penerang.
Ku Mawan madah, kaban SDNU patut mega sesingkang enggau perintah dalam mantu komuniti Dayak.
Ku iya nambah agi, tu beguna dikena nentuka agenda sereta polisi perintah ulih dibai enggau manah ngagai komuniti Dayak.
“Aram mih kitai ngetanka SDNU tu ngambika ulih meri servis ngagai komuniti kitai awakka semua objektif perintah ulih diasaika begulai dalam nentuka enda tinggal ari arus pemansang,” ku iya nambah.