Ukai semina peranak nengeri tu tang ari Sabah enggau Semenanjung datai bejualka produk kelebih agi asil pengelandik jari
"Baka dipadah YB Dato Sri Abdul Karim Rahman Hamzah, tu (Regata Sarawak) tu nerima sambut ti manah tauka meransang ati ari segi penyereta antarabansa dalam lumba Dragon Boat. Minggu baru sama dipelaba mayuh penyereta ari kitai menua tu ba Regata
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING:Premier Sarawak, Datuk Patinggi Tan Sri Abang Johari Tun Openg madah Regata Sarawak mantu orang dagang nyungkaka penatai pemisi orang dagang menua tu.
Regata Sarawak meri awak ngagai orang dagang negeri tu, sereta ari Sabah enggau Semenanjung bejualka asil tauka produk baka kraf pengelandik jari nengah Festival Kraf Tekstil Borneo.
Iya meri puji ngagai Opis Menteri Dagang Temuai, Industri Kreatif enggau Seni Pemerindang enggau mega Residen Kuching ke udah ngatur Regata Sarawak pengudah menua betapi COVID-19 dua taun.
"Baka dipadah YB Dato Sri Abdul Karim Rahman Hamzah, tu (Regata Sarawak) tu nerima sambut ti manah tauka meransang ati ari segi penyereta antarabansa dalam lumba Dragon Boat. Minggu baru sama dipelaba mayuh penyereta ari kitai menua tu ba Regata.
"Nya alai tu ulih mantu bala orang dagang kitai. Aku dipadah tu baru dibuka tauka berengkah kemari (ensanus) tang asil barang ke dijual kemari urung deka manggai RM200,000 ba kraf pengelandik jari ti bisi dipasuk penyereta ari Semenanjung sereta kitai ari menua tu empu baka ari Miri, Bintulu enggau ke bukai," ku iya lebuh dikerandau raban pengarang berita ba Regata Sarawak - Kuching Waterfront Festival 2022 ba ba Tebing Sungai Kuching ditu, kemari.
Dulu ari nya, Abang Johari ngaga 'eye dotting' tauka ngelut mata naga ba perau naga kelai bejadi Regata Sarawak - Kuching Waterfront Festival 2022, udah nya ditangkan kelai nyuaka Paddle ari bala Temnggong Bagi Menua Kuching.
Abang Johari ke disempulang Abdul Karim sereta pemesai ke bukai, mega bejadi Festival Kraf Tekstil Borneo, kelimpah ari nya bisi ngelekatka 'Pink Ribbon' enggau 'Flower Ceremony' kelai kena ngingatka Bulan Riman Tusu.
Kelimpah ari nya bepelasarka jaku pesan Abang Johari dalam bup Atur Cara Majlis Perasmian Regata Sarawak - Kuching Waterfront Festival 2022, madah pengudah dua taun endang ngatur aktiviti sereta diatu pintu garis antara negeri udah dibuka meri awak mayuh aktiviti tauka program ulih diatur nyengkaum Regata Sarawak iya nya pengerami lumba enggau main ai ti nyadi pengerami asal tiap taun Negeri Sarawak.
Ku iya, baka ke udah ditemu,perintah negeri Sarawak udah ngelangkar Strategi Pemansang Pengudah COVID-19 2030 ti enggau batang tuju ngenegap sereta ngemanahka ekonomi Sarawak lebuh manggai taun 2030.
Sarawak deka ngerembai maju ti bepelasarka data enggau inovasyen iya nya semua rayat deka ngasaika pemaik enggau pengelantang ti mungkur sosial enggau rampa menua ti meruan manah, ku iya.
"Kena nyapai negeri maju lebuh manggai 2030, Sarawak patut menggandakan saiz ekonomi ngagai RM282 bilion dalam taun 2030 enggau deka ngerembai ba pemayuh 8 peratus setaun nyentuk taun 2030.
"Sektor dagang temuai iya nya siti ari sektor ti meri penumbuh ekonomi Negeri Sarawak. Sektor tu udah nagit Sarawak nyadi palan besai ungkup eko-dagang temuai enggau aktiviti dagang di rantau ASEAN sereta ngenegapka komuniti nyaga pesaka tuai, budaya enggau biodiversiti. Lebuh manggai 2030, Sarawak nagit 11 peratus ngagai KDNK nengah sektor dagang temuai.
"Asil besai sektor dagang temuai baka bisi penambah ba penyampau penatai temuai iya nya enggau penyampau 7.5 peratus setaun enggau penambah ba timpuh nemuai ke Sarawak ari 5.5 peratus malam ngagai 7.5 malam. Tu mega ulih nambahka peluang gawa sepenyampau 25 peratud ari semua penyampau kereja dalam sektor dagang temuai enggau hotel," ku iya dalam jaku pesan nyerumba Regata Sarawak - Kuching Waterfront Festival 2022.