MIRI: Chairman Parti Sarawak Bersatu (PSB) Miri Datuk Lawrence Lai madahka sukung Parti Rakyat Bersatu Sarawak (SUPP) pengawa numbuhka perintah 'pintu belakang' nyadi siti ari kebuah iya ningkilka diri ari parti.
"Batang ke buah aku ningkilka diri ari SUPP iya nya aku udah nadai pengandal ati agi ngagai SUPP kelebih agi lebuh sida meri sukung ngagai perintah pintu belakang dalam taun 2020," ku iya madah ngagai pengarang berita, kemari.
Kelimpah ari nya, Lai mega madahka SUPP nyukung Tan Sri Muhyiddin Yassin dipilih nyadi Menteri Besai lalu dalam taun tu, nyata amat dipeda nyukung Pertubuhan Kebangsaan Melayu Bersatu (UMNO).
Ku Lai, sukung SUPP enggau Gabungan Parti Sarawak (GPS) ti nyadi 'kingmaker' udah ngemendarka UMNO bekuasa baru di Parlimen taja pan udah mujur ditumbangka perintah Pakatan Harapan (PH) maya PRU14 dalam taun 2018.
Lai mega madahka diri ngelaban ulah ekstremis ba jalai pengarap dalam perintah besai.
Iya madahka Parti Islam Se-Malaysia (PAS) nguji ngemendarka ukum hudud di Malaysia ti dipadahka iya enda engkeman enggau semengat rayat Malaysia ti mayuh pupu bansa.
"UMNO beberapa kali udah madah, enti sida ulih ngerebut baru kuasa pemerintah, sida deka nyukung PAS bejalaika undang-undang hudud ti ngujungka menua Malaysia amat nyadi menua Islam," ku iya seraya madahka sukung ngagai SUPP enggau GPS ngagai UMNO dikeirauka ngemendarka ukum nya dipejalaika.
Ku Lai nyentuk ke diatu, Sarawak enda dikemuning sereta agi disiping perintah besai.
Ba pengawa bejuraika bajet taun tu, iya madahka Sarawak semina nerima agih belanja 1.5 peratus lalu penyampau nya udah bekurang enti dibandingka enggau taun siti nyin tadi.
Iya madahka bajet ke sekali itu nya endang bajet pengawa bepilih tauka gula batu tusu dikena ngumpan enggau ngagaka ati pengundi.
"Deka negika hak Sarawak, kitai begunaka parti ari negeri tu. GPS parti negeri tu tang nyukung UMNO enggau PAS. Kitai begunaka parti negeri tu ti nadai diteresap enggau sebarang penemu," ku iya.
Ex- Datuk Bandar nya madah, iya udah nyadi kaban SUPP pengelama lebih tiga pulih taun.
Taja pan ukai agi nyadi kaban ku iya, tang kaul iya enggau ketuai nyengkaum kaban SUPP ba renggat nembiak redak agi meruan.
Iya nyadi kaban PSB dalam taun tu.