GPS dipelaba menang ba mayuh agi kerusi enti dibandingka enggau PRU12 bepelasarka prestasi maya PRN12
“Ba PRU15 tu, nadai kebuah GPS enda ulih menang besai sereta bulih mayuh kerusi sitak parlimen, dipelaba urung 25 sitak parlimen dalam jari”
Prof. Datuk Dr. Jayum Jawan
Profesor Bidang Politik Universiti Putra Malaysia (UPM)
Dikarang Rengenyan Labang
KUCHING: Gabungan Parti Sarawak (GPS) ba Pengawa Bepilih Besai Ke-15 (PRU15) dipelaba ulih menang ba mayuh agi sitak Parlimen enti dibandingka enggau maya PRU14.
Siku penganalisis politik, Profesor Bidang Politik Universiti Putra Malaysia (UPM), Prof. Datuk Dr. Jayum Jawan (gambar) madahka nya bepelasarka prestasi tauka penyulut parti komponen GPS maya Pengawa Bepilih Negeri Ke-12 (PRN12).
GPS (empat parti - Parti Pesaka Bumiputera Bersatu (PBB), Parti Bersatu Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP)) ke ngena logo Barisan Nasional (BN) maya PRU14, udah menang 19 ari 31 sitak Parlimen.
“Ba PRU15 tu, nadai kebuah GPS enda ulih menang besai sereta bulih mayuh kerusi sitak parlimen, dipelaba urung 25 sitak parlimen dalam jari.
“Parti PBB sida dipelaba ulih menang ba sitak ke diungkupka ngagai sida laban parti tu nadai mayuh penanggul ngetanka semua sitak ke suah alai menang.
“Baka SUPP ke endang suah belaban enggau Parti Tindakan Demokratik (DAP) berebutka sukung pengundi ba kandang mengeri, dipelabaka maya PRU15 parti tu tau bulih lebih ari ke udah (PRU14). Tu bepelasarka PRN12, iya nya sukung ari pengundi bisi berubah mimit sereta nguing ngagai SUPP,” ku iya lebuh dirandau Utusan Borneo.
Taja pia ku Felo, Akademik Sains Malaysia tu, GPS dipelaba bisi napi penanggul mimit nengah PRS ba beberapa iti sitak sida baka di Julau, Selangau, Lubok Antu enggau Sri Aman.
Ku iya, penanggul dalam parti PRS nya empu iya nya bala ketuai berebutka penuduk dalam parti ti ngujungka enda sepenemu lalu mai pengerugi maya PRU ke sekali tu, dipelaba bisi sekeda ‘nanchum ari belakang’.
“Aku melabaka sida alah ba siti tauka dua sitak parlimen tang bagi (sitak) nya bepanggai ba pengering diri ngalahka pangan diri.
“Laban orang ke menang nya udah tentu deka niki dalam penuduk parti, lalu nya alai (maya PRU tu) dipelaba bisi nyadi ‘nanchum ari belakang’ kena ngemuntanka niat deka niki dalam penuduk ke lebih tinggi dalam parti,” ku iya.
Nambahka nya, lebuh ngenang siti agi parti komponen GPS, iya nya PDP, iya madahka parti ke mimit ti diungkupka sitak parlimen tu mega dipelaba deka bebendar belaban ngetanka sitak ke udah dimenang sereta ngerebut pulai sitak ke udah alah.
Kebuah pia, kelimpah ari Parlimen Saratok ti dianggap sitak angat ti bekaul enggau isu sempekat entara GPS enggau Perikatan Nasional (PN) maya PRN12, dipelabaka Presiden parti tu empu ti mega penyandang Parlimen Bintulu, dipelabaka deka nyadi chalun ngetanka sitak nya.
“Nengah PDP, GPS mega dijangka deka bebendar ngerebut Parlimen Saratok enggau Bintulu. Kebuah pia, laban bisi didinga rita, Presiden PDP agi deka nyadi chalun di Bintulu taja iya udah megai Kunsil Negeri (DUN) Dudong.
“Mensia mayuh deka meda iya (Presiden) tu amu, laban iya udah megai DUN Dudong, megai pangku pengawa nyadi Duta sereta deka bediri minta pilih ba Parlimen Bintulu,” ku iya.
Berebak enggau tu, Jayum madahka deka nentuka GPS ulih ngambi pulai sereta ngetanka sitak Parlimen ke dimenang, chalun mesti pandai sereta landik bejaku nerangka tuju bediri minta pilih.
Chalun mega patut landik nerang sereta ngerintaika utai ti deka diaduka ba sitak alai iya bediri minta pilih, kelimpah ari nerangka pekara ke udah ulih diatur tauka diputarka ba pengawa sebedau nyadi chalun.
“Pengulih sida nerang sereta ngerintaika nama utai ke udah ulih diputarka, nya kelai chalun nya ulih tauka enda nanggung pengawa ti dipejalaika sida empu.
“Enti sida nadai pengawa ke dikereja, nama utai ke ulih dibai sida ngagai sitak enti menang lalu nyadi pengari rayat?,” ku iya.
Bekaul enggau manifesto, tetiap parti patut anang bechiping bejaku tang patut nerangka nama kebuah ke bendar sereta tuju pengawa bepilih nya.
Tuju pengawa bepilih iya nya milih pengari sereta milih orang ke megai perintah lalu pengawa bepilih tu dipejalaika laban perintah udah direrak, ku iya.